జగన్ పై యనమల పైర్- మంత్రి టీజీ హెచ్చరిక

Posted: 11/21/2013 07:37 PM IST

జగన్ దేశ పర్యటన సమైక్యం కోసం కాదు...ఫెడరల్ ఫ్రంట్ ఏర్పాటు కోసమే అని టీడీపీ నేత యనమల రామకృష్ణుడు ఆరోపించారు. ఈరోజు మాట్లాడుతూ ఎస్పీ, టీఎంసీ పార్టీలు చిన్నరాష్ట్రాలకు వ్యతిరేకమని, అలాంటప్పుడు జగన్ వెళ్లి వాళ్లను ఒప్పించేదేమీ లేదని ఆయన అన్నారు. ములాయంను కలవబోతున్న జగన్ మాయావతిని ఎందుకు కలవడం లేదని ప్రశ్నించారు.

 

సోనియాతో శాశ్వత ఒప్పందం, తన లూటీకి మిగిలిన పార్టీల ఆమోదమే జగన్ ఎజెండా అని విమర్శించారు. సూట్‌కేసు కంపెనీలకు కలకత్తానే కేంద్రమన్నారు. జగన్ విషయంలో రాజకీయ పార్టీలు, కోర్టులు అప్రమత్తంగా ఉంచాలని హెచ్చరించారు. విభజనపై సీఎం కిరణ్ సుప్రీంలో కేసు వేస్తారా లేదా చూడాలని యనమల పేర్కొన్నారు.

 

రద్దు చేయాలి : టీజీ

తెలంగాణ బిల్లు కంటే ముందే అసెంబ్లీని రద్దు చేయాలని ముఖ్యమంత్రి కిరణ్‌కుమార్‌రెడ్డిని కోరినట్లు మంత్రి టీజీ వెంకటేష్ పేర్కొన్నారు. ఈ విషయాన్ని న్యాయనిపుణులతో కూడా చర్చిస్తున్నట్లు ఆయన తెలిపారు. ఆయన మాట్లాడుతూ సమైక్యవాడం ముసుగులో నిజమైన సమైక్యవాదులను టార్గెట్ చేస్తున్నారని, విభజన జరిగిన తర్వాత సమైక్యం పేరుతో కొత్త పార్టీ పెట్టినా ప్రయోజనం లేదని టీజీ వ్యాఖ్యానించారు.

 

రాష్ట్రానికి వచ్చే ముసాయిదా బిల్లులో రాయల తెలంగాణపై అభిప్రాయం కోరే అంశం ఉంటుందని, దీనిపై ఎలాంటి నిర్ణయం తీసుకోవాలో మున్సిపల్ కార్పొరేటర్లు, సర్పంచ్లతో చర్చలు జరుపుతామన్నారు. ఆ తర్వాతే అంతిమ నిర్ణయానికి వస్తామని టీజీ తెలిపారు. ఏపీ ఎన్జీవోల ఛలో ఢిల్లీకి తమ మద్దతు ఉంటుందని ఆయన తెలిపారు.