Posted: 01/24/2012 12:19 PM IST

తెదేపా నాయకురాలు నన్నపనేని రాజకుమారి ఈ రోజు మీడియాలో మాట్లాడుతూ, తెదేపా దివంగత నేత ఎన్టీఆర్ మృతి కారణమైన ఆయన రెండవ భార్య లక్ష్మీ పార్వతి వ్యాఖ్యలను ఖండిస్తూ, ఆమె నాలుక కోస్తానని హెచ్చరించారు. తెలుగుదేశం పార్టీ సంస్థాపకుడు ఎన్టీఅర్ ఎంతో ఆరోగ్యవంతుడని, ఆటువంటి మహానాయకుడిని పొట్టన బెట్టుకున్నది లక్ష్మీ పార్వతేనని, అన్నివిధాలుగా ఎన్టీఆర్ ని భ్రష్టుపట్టించిన లక్ష్మీ పార్వతికి తెలుగుదేశం పార్టీ గురించి మాట్లాడే హక్కుకానీ, తెదేపా వ్యవహారాల మీద వ్యాఖ్యానించే హక్కు కానీ లేదని రాజకుమారి అన్నారు.

 నాలుక కోసే పనిలో పడినవారందరికీ ఆ పని ఒక్కదానికి సిద్ధమైతే సరిపోయేట్టుగా లేదు. ఎందుకంటే రాజకీయాల్లో ఒక నాలుక కాకుండా రెండు, అవసరమైతే ఇంకా ఎక్కువ నాలుకలతో వ్యవహరించటం నాయకులందరికీ అలవాటే. గాలి ఎటు వీస్తే అటు పరిగెత్తే ధోరణిలో ఉండే రాజకీయ నాయకులకు ఒక నాలుకతో పని జరగదని నన్నపనేని లోగడ నాదెండ్ల భాస్కర్ ముఖ్యమంత్రిగా వ్యవహరిస్తున్న సమయంలో ఆయన దగ్గర కల్చరల్ ఎఫైర్స్ అండ్ టూరిజం మంత్రిగా పనిచేస్తున్న సమయంలో ఎన్టీఆర్ ని విమర్శించటం, ఆ తర్వాత వైయస్ ఆర్ హయాం లో కూడా ఆయనకు మద్దతుగా మాట్లాడుతూ చంద్రబాబుని విమర్శించటం గుర్తు చేసుకుంటే తెలుస్తుంది. ఇలా రాజకీయాల్లో ఎటుబడితే అటు మాట్లాడుతూ మొత్తం రాజకీయాలనే భ్రష్టు పట్టిస్తున్న నాయకుల నాలుకలు కోయాలంటే ఫుల్ టైం జాబే అవుతుంది. కాబట్టి ఇప్పుడు ప్రత్యేకంగా నన్నపనేని మాటలను పట్టించుకోవలసిన అవసరమేమీ లేదనిపిస్తోంది.  

-శ్రీజ