Posted: 04/21/2012 10:18 AM IST

పాకిస్తాన్‌లో 127 మంది ప్రయాణికులతో ప్రయాణిస్తున్న విమనం ఒకటి శుక్రవారం సాయత్రం 6 గంటల నలభై నిమిషాల సమయంలో కూలిపోయింది. విమానంలో 118 మంది ప్రయాణికులు, 9 మంది సిబ్బంది ఉన్నారు. పాకిస్తాన్ రక్షణ శాఖ కూడా విమానం కూలిపోయిన విషయాన్ని ధ్రువీకరించింది. కరాచీనుంచి ఇస్లామాబాద్‌కు వస్తున్న భోజా ఎయిర్‌లైన్స్‌కు చెందిన విమానం రావల్పిండిలోని చక్లాలా ఎయిర్‌బేస్‌కు సమీపంలో కూలిపోయినట్లు అధికారులు చెప్తున్నారు.

బోయింగ్ 747 రకానికి చెందిన ఈ విమానం తొలిసారి ప్రయాణిస్తుండడం గమనార్హం. విమానం జనసమ్మర్దంగా ఉన్న చోట కూలిపోయినట్లు చెప్తున్నారు. ఈ విమానం సాయంత్రం 7 గంటలకు ఇస్లామాబాద్ చేరుకోవలసి ఉంది. ప్రాథమిక సమాచారాన్ని బట్టి విమానంలోని అందరూ చనిపోయినట్లు, విమానం పూర్తిగా ధ్వంసమైనట్లు తెలుస్తోంది. సహాయక కార్యక్రమాలు కొనసాగుతున్నాయి.

సంఘటన స్థలానికి సైన్యాన్ని కూడా హుటాహుటిన పంపించారు. విమానం ఇస్లామాబాద్ విమానాశ్రయంలో దిగడానికి సిద్ధమవుతున్న తరుణంలో అది కూలిపోయినట్లు చెప్తున్నారు. వాతావరణం బాగా లేకపోవడమే ప్రమాదానికి కారణమై ఉండవచ్చని భావిస్తున్నారు. ప్రమాదం జరిగినప్పుడు ఈ ప్రాంతంలో భారీ వర్షం కురుస్తోంది. విమానం మండుతున్న అగ్నిగోళంలాగా ఆకాశంలోంచి కూలిపోయినట్లు ప్రత్యక్ష సాక్షులు చెప్తున్నారు. అంటే ఆకాశంలో ఉన్నప్పుడే విమానంలో మంటలు చెలరేగినట్లు అర్థమని నిపుణులు అంటున్నారు.