Posted: 03/19/2013 08:17 PM IST

యూపీఏ సర్కార్ నుంచి డీఎంకే వైదొలిగింది. శ్రీలంకలో తమిళుల వ్యవహారంపై యూపీఏ వ్యవహార శైలిపై ఆగ్రహం వ్యక్తం చేస్తూ ఏకంగా ప్రభుత్వం నుంచి వైదొలుగుతున్నట్టు డీఎంకే ప్రకటించింది. డీఎంకేకు చెందిన ఐదుగురు మంత్రులు కేంద్ర కేబినెట్‌ నుంచి రాజీనామా చేస్తారని పార్టీ అధ్యక్షుడు కరుణానిధి ప్రకటించారు. మంత్రులు రాజీనామా లేఖల్ని ప్రధానికి అందజేసే అవకాశం ఉంది. చెన్నైలో ఏర్పాటు చేసిన పార్టీ అత్యవసర సమావేశంలో డీఎంకే ఈ నిర్ణయం తీసుకున్న విషయం తెలిసిందే. శ్రీలంకలో తమిళులపై వెలుగుచూడని అరాచకాలపై స్వతంత్ర, విశ్వసనీయ సంస్థతో దర్యాప్తు చేయించాలన్న డీఎంకే డిమాండ్ కు కాంగ్రెస్ అధినేత్రి సోనియా గాంధీ మద్దతు తెలిపారు. శ్రీలంకలో తమిళులు పడుతున్న బాధలు తమ హృదయాలను కలచివేశాయని అన్నారు. సమాన హక్కులు, సమ న్యాయరక్షణకు తమ మద్దతు ఎప్పుడూ ఉంటుందని చెప్పారు. ఇందిర, రాజీవ్ జమానా నుంచి ఇది కొనసాగుతోందని కాంగ్రెస్ పార్లమెంటరీ పార్టీ సమావేశంలో సోనియా అన్నారు.