తెలంగాణలో బస్సులు రైట్ రైటేనా..? మరి ఏపిలో

Posted: 05/12/2015 11:46 AM IST

Telangana govt almost ready to give 40 percent fitment for rtc employees

ఆర్టీసీ కార్మికులు చేస్తున్న సమ్మె ఏడో రోజుకు చేరింది. తెలంగాణ ప్రభుత్వం కనీసం చర్చలు జరిపి, కేబినెట్ సబ్ కమిటిని నియమించింది. కానీ ఏపిలో మాత్రం పరిస్థితి ఏం మారలేదు. కేవలం 27 శాతం మాత్రమే ఫిట్ మెంట్ ఇస్తామని అక్కడి మంత్రులు ఖరాఖండిగా చెప్పేశారు. మరోవైపు ఆర్టీసీ కార్మికులకు 40 శాతం ఫిట్‌మెంట్‌ ఇచ్చేందుకు తెలంగాణ ప్రభుత్వం సిద్ధమవుతున్నట్లు సమాచారం. అయితే ఆంధ్రప్రదేశ్‌లో మాత్రం ఆర్టీసీ సమ్మెపై ప్రతిష్ఠంభన కొనసాగుతోంది. మరోవైపు హైకోర్టు మధ్యంతర తీర్పును సవాల్‌ చేస్తూ కార్మిక సంఘాలు మంగళవారం కోర్టులో అఫిడవిట్‌ దాఖలు చేయనున్నాయి.

తెలంగాణ కేబినెట్‌ సబ్‌ కమిటీ 39 శాతం ఫిట్‌మెంట్‌కు అంగీకారం తెలిపింది. ప్రస్తుతం ఫిట్‌మెంట్‌ను 39 శాతంగా నిర్ణయించినప్పటికీ సీఎం కేసీఆర్‌తో జరిగే భేటీలో అది 40 శాతంగా ఖరారు కావచ్చునని సమాచారం. సమ్మె పరిష్కారం అవుతుందన్న నమ్మకాన్ని సబ్‌ కమిటీ సభ్యులు వ్యక్తం చేశారు. అవసరమైతే కార్మిక సంఘాల నేతలతో కేసీఆరే స్వయంగా చర్చలు జరుపుతారని నాయిని నర్వింహారెడ్డి చెప్పారు. అయితే మరోపక్క తెలంగాణలో ఆర్టీసీ బస్సులను రోడ్డెక్కించడానికి తెలంగాణ సర్కార్ ప్రయత్నాలను సాగిస్తోంది. అందులో భాగంగా ఆర్టీసీ కార్మిక సంఘం నాయకుడు, తెలంగాణ నీటిపారుదల మంత్రి హరీష్ రావ్ తో కేసీఆర్ మంతనాలు జరపనున్నారు. ఆర్టీసీ కార్మికులకు ఎంత మేర ఫిట్ మెంట్ ఇవ్వాలి.. ఒకవేళ ఫిట్ మెంట్ తర్వాత ఆర్థిక భారాన్ని ఎలా భర్తీ చెయ్యాలన్నదానిపై ఇద్దరు సమాలోచనలు జరపనున్నారని సమాచారం. మొత్తానికి నేటితో తెలంగాణలో ఆర్టీసీ కార్మికుల సమ్మెకు తెర దించాలని తెలంగాణ సర్కార్ ఆలోచిస్తున్నట్లు సమాచారం.

*అభినవచారి*