జిల్లాలపై స్పీడుమీదున్న కేసీఆర్

Posted: 05/17/2016 09:59 AM IST

తెలంగాణ స్వరూపాన్ని మార్చేందుకు, పరిపాలన సౌలభ్యం కొరకు కొత్త జిల్లాల ప్రతిపాదనను ముందుకు తీసుకువచ్చారు తెలంగాణ సిఎం కేసీఆర్. కొత్త జిల్లాల ఏర్పాటు అంశాన్ని సీఎం కేసీఆర్‌ చాలా సీరియస్‌గా తీసుకున్నారు. దీంతో కొత్త జిల్లాల ఏర్పాటు ప్రక్రియ ఊపందుకుంది. ఇప్పటికే చీఫ్‌ సెక్రటరీ రాజీవ్‌శర్శ నేతృత్వంలోని ఓ కమిటీ.. జిల్లాల ఏర్పాటు ప్రక్రియను పరిశీలిస్తుండగా.. మరో ఇద్దరు అధికారులకు జిల్లాల పునర్విభజన బాధ్యతలు అప్పగించారు.

ఇక కొత్త జిల్లాల ఏర్పాటు విషయంలో... హైదరాబాద్‌ నుంచి జిల్లా కేంద్రం దూరం ఎంత ? పాలనాపరంగా అన్ని వర్గాల ప్రజలకు అందుబాటులో ఉంటుందా ? అనే అంశాలను పరిశీలించాలని కేసీఆర్‌ అధికారులకు సూచించినట్లు తెలుస్తోంది. అదేవిధంగా మారుమూల ప్రాంతాలకు సైతం జిల్లా కేంద్రం 60 కి.మీ పరిధిలోపు ఉండేలా... జిల్లా హెడ్‌క్వార్టర్‌ గ్రోత్‌ కారిడార్‌గా ఎదిగేందుకు అనువైన పట్టణంగా ఉంటుందా ? లాంటి స్థిరమైన ప్రమాణాలను పాటించాలని సీఎం సూచించారు. ఈ అంశాల ప్రాతిపదికనే 17 నుంచి 18 సరిహద్దు ముసాయిదా నమూనాలతో తెలంగాణ రాష్ట్ర శాటిలైట్‌ మ్యాప్‌లను కూడా అధికారులు సిద్ధం చేసినట్లు తెలుస్తోంది.