ఐదు రాష్ట్రాల ఎన్నికల ఫలితాలు నేడే

Posted: 05/19/2016 08:31 AM IST

దేశవ్యాప్తంగా ఒక్కటే టెన్షన్.. ఈ ఎన్నికల్లో ఎవరు గెలుస్తారు.? ఎవరు ఓడపోతారు.? పశ్చిమబెంగాల్ లో మళ్లీ మమత పాగా వేస్తారా? తమిళ పీఠం అమ్మదా, అయ్యదా? కేరళలో కాంగ్రెస్ కు వామపక్షాలు షాక్ ఇస్తాయా? అసోంలో తొలిసారిగా కమలం వికసిస్తుందా? పుదుచ్చేరిలో డీఎంకే సత్తా చాటుతుందా? ఈ ప్రశ్నలకు మరి కొన్ని గంటల్లో సమాధానం దొరకనుంది.ఐదు రాష్ట్రాలు. కీలక ప్రాంతాలు. దేశ రాజకీయాలపై ప్రభావం చూపగల సత్తా ఉన్నవి. ఆ ఐదు రాష్ట్రాలకు కాబోయే ముఖ్యమంత్రుల భవిష్యత్తు నేడు తేలిపోనుంది. నేటితో వారి సీఎం గిరీ ముగుస్తుందా? లేక మరో ఐదేళ్ల పాటు వారి పాలన కొనసాగుతుందా? అన్న విషయం నేటి మధ్యాహ్నం 3 గంటల్లోగా తేలిపోనుంది.

దేశంలోనే కీలక రాష్ట్రాలైన పశ్చిమ బెంగాల్, తమిళనాడు సహా కేరళ, అసోం, కేంద్రపాలిత ప్రాంతం పుదుచ్ఛేరి అసెంబ్లీలకు ఇటీవలే ఎన్నికలు ముగిసిన సంగతి తెలిసిందే. ఈ ఎన్నికలకు సంబంధించిన ఓట్ల లెక్కింపు నేటి ఉదయం 8 గంటలకు ప్రారంభం కానుంది. ఈ మేరకు ఓట్ల లెక్కింపునకు అవసరమైన అన్ని ఏర్పాట్లను కేంద్ర ఎన్నికల సంఘం పూర్తి చేసింది. ఓట్ల లెక్కింపు ప్రారంభమైన మూడు గంటల్లోనే ఆయా రాష్ట్రాల్లో ప్రజల ఎవరి వైపు మొగ్గు చూపారన్న విషయంపై క్లారిటీ రానుంది. మధ్యాహ్నం 3 గంటలకు దాదాపుగా ఓట్ల లెక్కింపు పూర్తి కానుంది. ఎగ్టిట్ పోల్స్ లో మిశ్రమ ఫలితాలు వెలువడిన నేపథ్యంలో ఐదు రాష్ట్రాల్లోనూ ఆయా పార్టీలు ఓట్ల లెక్కింపుపై ఉత్కంఠగా ఎదురుచూస్తున్నాయి. ఆ రాష్ట్రాల సీఎంలుగా ఉన్న మమతా బెనర్జీ(పశ్చిమ బెంగాల్), జయలలిత(తమిళనాడు), ఉమెన్ చాందీ(కేరళ), తరుణ్ గొగోయ్(అసోం), రంగసామి(పుదుచ్ఛేరి)లు మరింత ఆసక్తిగా ఫలితాల కోసం ఎదురుచూస్తున్నారు. ఈ ఐదుగురిలో ఒక్క మమతా బెనర్జీ మినహా ఏ ఒక్కరికి ఎగ్జిట్ పోల్స్ లో పూర్తి స్థాయి అనుకూల ఫలితాలు రాకపోవడమే ఇందుకు కారణం.