జగన్ కి బిగ్ షాక్.. కర్నూలు, కడప కూడా తెదేపాకే...

Posted: 03/20/2017 10:49 AM IST

స్థానిక సంస్థల ఎమ్మెల్సీ ఎన్నికల్లో ప్రతిపక్ష వైసీపీకి చుక్కెదురైంది. కంచుకోటగా ఉన్న కడపతోపాటు, కర్నూలులో కూడా ఓటమి చవిచూసింది. ఇప్పటికే నెల్లూరు స్థానాన్ని వాకాటి కైవసం చేసుకున్న విషయం తెలిసిందే. దీంతో మూడు స్థానాల్లో గెలుపుతో టీడీపీ క్లీన్ స్వీప్ చేసింది. కర్నూలులో తెలుగుదేశం పార్టీ అభ్యర్థి శిల్పా చక్రపాణిరెడ్డి విజయం సాధించగా, కడపలో బీటెక్ రవి గెలుపొందాడు. గౌరు వెంకటరెడ్డిపై, శిల్పా 56 ఓట్ల తేడాతో విజయం సాధించినట్టు తెలుస్తోంది. కౌంటింగ్ కేంద్రం వద్దనే ఉండి లెక్కింపును పరిశీలించిన శిల్పా, తన విజయానంతరం కార్యకర్తలతో చేతులు కలుపుతూ, ఆనందంగా కనిపించారు. దీనిపై కాసేపటి క్రితమే అధికారిక ప్రకటన వెలువడింది.

ఇక వైకాపా అధినేత జగన్ సొంత జిల్లా అయిన కడపలో, ఏకంగా వైయస్ రాజశేఖరరెడ్డి తమ్ముడు, జగన్ బాబాయ్ వివేకానంద రెడ్డి ఓటమిపాలు కావడంతో ఆ పార్టీకి పెద్ద షాక్ తగిలింది. ఆయనపై టీడీపీ అభ్యర్థి బీటెక్ రవి  34 ఓట్లతో విజయదుందుభి మోగించాడు. దీంతో, జగన్ జిల్లాలో ఫస్ట్ టైం టీడీపీ జెండా ఎగిరినట్లయ్యింది.

కర్నూలు జిల్లాలో తెలుగుదేశం పార్టీపై నెలకొన్న అసంతృప్తి తమకు కలిసి వస్తుందని వైకాపా భావించినప్పటికీ, అది వాస్తవ రూపం దాల్చకపోగా, కడపలో అయితే బిగ్ షాక్ తగిలిందనే చెప్పుకోవాలి. ఇక ఎదురేలేని కడప జిల్లాలో తీవ్రంగా శ్రమించినప్పటికీ ఓటమిపాలు కావటంతో వైసీపీ శ్రేణులు తీవ్ర నిరాశకు లోనయ్యాయి.