నిందితుడు శ్రీనివాసరావు నేరచరిత్ర కూడా ఘనమే: ఏపీ పోలీసులు

Posted: 10/26/2018 12:27 PM IST

విశాఖ ఎయిర్ పోర్టులో వైఎస్సార్ కాంగ్రెస్ అధినేత జగన్ పై దాడి జరిపిన శ్రీనివాస రావు నేరచరిత్ర కూడా ఘనమేనని ఏపీ పోలీసుల దర్యాప్తులో వెల్లడైంది. ప్రతిపక్ష నేతపై కోడిపందాలకు వాడే కత్తితో దాడి చేసిన శ్రీనివాసరావుపై గతంలోనే పలు పోలీసు కేసులు నమోదయ్యాయి. కోడిపందాలపై ప్రేమతో చదువుకు మంగళం పాడేసిన శ్రీనివాసరావు, కూలీ పనులు చేసుకుని కాలం గడుపే తాతారావు, సావిత్రిల ఐదో సంతానం. ఠాణేలంకలో పదో తరగతి వరకూ మాత్రమే చదువుకున్నాడు.

గత సంవత్సరం కాగిత వెంకటేశ్ అనే యువకుడిపై దాడి చేశాడని ముమ్మిడివరం పోలీసు స్టేషన్లో ఓ కేసు నమోదై ఉంది. ఇక శ్రీనివాసరావుకు గ్రామంలోని పలువురితో వివాహేతర సంబంధాలు ఉన్నాయని తెలుస్తోంది. ఈ విషయమై గ్రామపెద్దలు పలుమార్లు శ్రీనివాసరావును మందలించినట్టు గ్రామస్తులు అంటున్నారు. ఇక ఏకంగా ప్రతిపక్ష నేత జగన్ పై కోడిపందేలాకు వినియోగించే కత్తితో దాడి చేయడానికి గల కారణాలు ఏంటన్న విషయమై పోలీసు ఉన్నతాదికారులు శ్రీనివాసరావుపై ప్రశ్నల వర్షం కురిపిస్తున్నారు.

ఇప్పటికే శ్రీనివాసరావు కాల్ డేటాను సేకరించిన పోలీసులు, అందులో తరచూ ఫోన్ కాల్స్ వెళ్లిన నంబర్ల వివరాలు, గత రెండు నెలల పరిధిలో ఆయన మాట్లాడిన కాల్స్ గురించి సమాచారాన్ని అడిగి తెలుసుకుంటున్నారు. ఏ ఉద్దేశంతో ఈ పని చేశావు? దీని వెనుక ఎవరున్నారు? ఇటీవల పెద్ద పార్టీ ఇచ్చావటగదా? దానికి డబ్బు ఎక్కడి నుంచి వచ్చింది? ఎయిర్ పోర్టులో ఉద్యోగానికి ఎవరు రికమండ్ చేశారు? కత్తిని ఎలా విమానాశ్రయంలోకి తేగలిగావు? కత్తి తెచ్చిన రోజు సీఐఎస్ఎఫ్ పోలీసులు తనిఖీ చేయలేదా? వంటి ప్రశ్నలను అధికారులు సంధించినట్టు తెలుస్తోంది.

వీటితో పాటు, జగన్ పై దాడి చేస్తే, సానుభూతి వస్తుందని ఎలా అనుకున్నావు? ఆయన సీఎం అయితే బాగుంటుందని నీకు ఎవరైనా చెప్పారా? జగన్ పై దాడికి ఎవరు ప్రోత్సహించారు? తదితర ప్రశ్నలు అడిగి శ్రీనివాస్ నుంచి సమాధానాలు రాబడుతున్నట్టు తెలుస్తోంది. నిందితుడి నేర చరిత్ర, కుటుంబ నేపథ్యం, స్నేహితులు, పరిచయస్తుల వివరాలను కూడా విచారిస్తున్నామని పోలీసు వర్గాలు వెల్లడించాయి. కాగా, శ్రీనివాస్ ను ఇవాళ న్యాయస్థానంలో హాజరుపర్చనున్నారు పోలీసులు.