యాదాద్రి దేవాలయ గోపురానికి బంగారు తాపడం.. 60 కిలోల బంగారం..

Posted: 09/21/2021 10:06 AM IST

Yadadri temple vimana gopuram golden drap requires 60 kgs gold

తెలంగాణ తిరుపతిగా అద్భుతంగా రూపుదిద్దుకుంటున్న యాదాద్రి లక్ష్మీనరసింహాస్వామి దేవాలయం చేరుకున్న భక్తులకు గుట్ట ఆవరణలో అడుగుపెట్టగానే ఆధ్యాత్మికత వెల్లివిరిసేలా ఆలయ జీర్ణోద్దరణ పనులు శరవేగంగా జరుగుతున్నాయి. ఇక కొండపైకి చేరుకున్న తరువాత సాక్ష్యాత్తు వైకుంఠంలోకి ప్రవేశించిన భావన భక్తులలో ఫరడవిల్లేలా ఆలయ అధికారులు ఏర్పాట్లు చేస్తున్నారు. దీంతో యాదాద్రి కొత్త శోభను సంతరించుకోనుంది. గర్భాలయంపై 48 అడుగుల ఎత్తుతో నిర్మించిన విమాన గోపురానికి 45 అడుగుల మేర బంగారు తాపడం చేయాలని యాదాద్రి ఆలయ అధికారులు నిర్ణయించారు.

దీంతో భక్తుల నుంచి విరాళాలు సేకరించేందుకు ఆలయ కమిటీ నిర్ణయించింది. యాదాద్రి విమానగోపురం స్వర్ణ తాపడం కోసం ఏకంగా 60 కేజీల బంగారం అవసరం అవుతుందని ఆలయ అధికారులు అంచనా వేస్తున్నారు. దీంతో స్వామిఅమ్మవార్లు కొలువుదీరనున్న ఈ ఆలయ విమానగోపురంలో తమకు అవకాశం కల్పించాలని ఇప్పటికే రాష్ట్రంలోని అనేక మంది భక్తాగ్రేసుల నుంచి వినతులు వెల్లువెత్తుతున్నాయి. దీంతో ఆలయ విమానగోపురానికి స్వర్ణతాపడం చేయడం కోసం అవసరమయ్యే 60 కేజీల బంగారాన్ని భక్తుల నుంచే సేకరించాలని ఆలయ కమిటీ నిర్ణయం తీసుకుందని సమాచారం. అయితే మరికోందరు మాత్రం రాష్ట్రంలోని పలువురు దాతల నుంచి బంగారాన్ని సేకరించాలని నిర్ణయించారని తెలుస్తోంది.

కాగా సామాన్య భక్తులు కూడా తమ శక్తిమేరకు బంగారాన్ని అదే రూపంలోనైనా లేక ధన రూపంలోనైనా చెల్లించేలా చేసి.. ఆలయ జీర్ణద్దరణ కార్యక్రమంలో వారికి అవకాశాన్ని కల్పించేలా చేయాలని ఆలయ కమిటీలో అత్యధికులు నిర్ణయించారని తెలుస్తోంది. మరి ఈ నిర్ణయాలపై రాష్ట్ర దేవాదాయశాఖ ఎలాంటి నిర్ణయం తీసుకోనుందన్న విషయం వేచిచూడాల్సిందే. మరోవైపు, ఉత్సవ మూర్తుల నిత్య ఉత్సవాలకు వినియోగించే కొయ్య రథానికి స్వర్ణ తొడుగుల పని దాదాపు పూర్తయింది. రాగి తొడుగులు ఇప్పటికే సిద్ధం కాగా, వాటికి బంగారు తాపడం చేస్తే పని పూర్తయినట్టే. ఈ నెలాఖరు లోపు రథం యాదాద్రికి చేరుకుంటుందని ఆలయ ఈవో గీత తెలిపారు. కాగా, స్వర్ణ రథం తయారీకి రూ. 60 లక్షలు ఖర్చవుతుండగా దానిని శ్రీలోగిళ్లు, ల్యాండ్‌మార్క్ రియల్ ఎస్టేట్ సంస్థల అధినేతలు సురేశ్‌రెడ్డి, రవీందర్‌రెడ్డి భరిస్తున్నారు.