భద్రతకు ఏడు సూత్రాలు

Posted: 05/05/2013 12:22 PM IST

విద్యార్థుల పర్యటనలో, మానాన్నగారు టైముకి భోజనం చెయ్యమన్నారు అన్నాడట ఒక విద్యార్థి.  అబ్బాయి తండ్రిగారు ఇంకా ఎన్నో జాగ్రత్తలు చెప్పుంటారు కానీ, ఇది తనకీ కావలసిందే కాబట్టి దాన్ని మాత్రం ఠంచన్ గా పాటించాడు ఆ తిండిపోతు. 

భారత ప్రభుత్వాన్ని సవాల్ చేస్తూ ప్రకాశ్ సింగ్ 2006లో దాఖలు చేసిన పిటిషన్ కేసులో సుప్రీం కోర్టు, శాంతి భద్రతలను నెలకొల్పటానికి ఏడు మార్గదర్శకాలను చేసింది.  అందులో మొదటిది రాష్ట్ర భద్రతా కమిషన్ ని నెలకొల్పటం.  ఆ పనిని మాత్రం నిన్న హడావిడిగా తమకే పుట్టిన బుద్ధిలా హోం మంత్రి సిఫారసు చెయ్యటం, ఆ దిశగా ముఖ్యమంత్రి ఆమోద ముద్ర వేయటం జరిగిపోయింది.  పూర్తి చేసిన మరో పని, పోలీస్ ఎస్టాబ్లిష్ మెంట్ బోర్డ్ ని స్థాపించటం.  అందులో పోలీసు ఉద్యోగుల నియామకాలు, బదిలీలు, పదోన్నతుల నిర్ణయాలు జరుగుతాయి.

ఇక పోలీసు శాఖలో అనుసరించవలసిన మిగిలిన మార్గదర్శకాల విషయంలో ఎవరూ ఏమీ మాట్లాడటం లేదు.  ఏమిటా మిగిలిన మార్గదర్శకాలు

3. డిజిపి పదవీ కాలం రెండు సంవత్సరాలకు పరిమితం.  4. ఎస్ పి లు ఎస్ హెచ్ ఓలకు రెండు సంవత్సరాల కాల పరిమితి.  5. దర్యాప్తులు చేసే విభాగం, చట్టాలను అమలుపరచే విభాగాలు విడివిడిగా ఉండాలి. 6. రాష్ట్ర జిల్లా స్థాయిల్లో పోలీస్ ఫిర్యాదుల అధికార కార్యాలయాలను స్థాపించాలి.  7. కేంద్రంలో జాతీయ భద్రతా కమిషన్ ని స్థాపించాలి.  

మరో ఆసక్తి కరమైన విషయం ఏమిటంటే, డిజిపి వి.దినేష్ రెడ్డి నియామకం 29.9.2012 లో జరిగింది.  అందులో రెండు సంవత్సరాల పదవీకాలం అనేదేమీ సూచించ లేదు.  తమిళనాడు హైకోర్టు ఆదేశాన్నిఅనసరిస్తే, ఆ నియమం ప్రకారం వారి రిటైర్ మెంట్ డేట్ తో సంబంధం లేకుండా రెండు సంవత్సరాల కాల పరిమితిని పాటించాలి.  అంటే 28.9.2014 వరకు డిజిపిగా పనిచేయవచ్చు.  కానీ దినేష్ రెడ్డి కి సెప్టెంబర్ 18, 2013 కి 60 సంవత్సరాలు నిండుతున్నాయి.  నియామకంలో స్పష్టత లేకపోవటం వలన దినేష్ రెడ్డి పదవీ కాలంలో మరోసారి వివాదం చోటుచేసుకోబోతోంది.

మొదటి సారి 2011 లో డిజిపిగా నియామకం జరిగినప్పుడు వచ్చిన వివాదం వలన సెంట్రల్ ఎడ్మినిస్ట్రేటివ్ ట్రిబ్యునల్ ఆయన నియామకాన్ని రద్దు చేసింది.  ఆ తర్వాత హైకోర్టు ఆదేశాలకనుగుణంగా రాష్ట్ర ప్రభుత్వం ఆయనను 2012 లో డిజిపిగా నియమించింది.

-శ్రీజ