తెలంగాణ నోట్‌ రెడీ -లగడపాటి ఊరట

Posted: 09/19/2013 06:06 PM IST

తెలంగాణ ప్రత్యేక రాష్ట్రం ఏర్పాటుపై కేంద్ర మంత్రి మండలి నోట్‌ సిద్ధమైందని కేంద్ర హోం మంత్రి సుశీల్ కుమార్ షిండే చెప్పారు. ఆ నోట్ ను ఈ రోజు పరిశీలిస్తామన్నారు. హైదరాబాద్‌ గురించి ఎటువంటి నిర్ణయం తీసుకోలేదని షిండే చెప్పారు. ఈ రోజు సాయంత్రం జరగవలసిన కేంద్ర మంత్రి మండలి సమావేశం రేపటికి వాయిదా పడిన విషయం తెలిసిందే. ముఖ్యమైన కేంద్ర మంత్రులు కొందరు అందుబాటులో లేకపోవడం వల్ల ఈ సమావేశం రేపటికి వాయిదాపడింది. మంత్రి మండలి సమావేశం ఎజెండాలో తెలంగాణ అంశం లేదని తెలుస్తోంది. ఈ నోట్ ను రేపు జరిగే మంత్రి మండలి సమావేశంలో పరిశీలనకు వస్తుందో, రాదో స్పష్టంగా తెలియడంలేదు. రాష్ట్ర విభజన ప్రకటన వెలువడిన తరువాత ప్రధానంగా హైదరాబాద్ పైనే చర్చ జరుగుతోంది. మిగిలిన విషయాలు ఎలా ఉన్నా ఒక్క హైదరాబాద్ విషయంలోనే పీటముడి పడింది. ఆరు దశాబ్దాలుగా రాజధానిగా ఉన్న హైదరాబాద్‌పై హక్కులు ఎవరివనేది మిలియన్‌ డాలర్ల ప్రశ్నగా మిగిలింది. ఈ నేపధ్యంలో హైదరాబాద్‌ గురించి ఎలాంటి నిర్ణయం తీసుకోలేదని షిండే చెబుతున్నారు. హైదరాబాద్ విషయం తేలకుండా విభజన అంశం తేలడం కష్టం.

 

లగడపాటికి సుప్రీంలో ఊరట

సుప్రీం కోర్టులో లగడపాటికి రాజగోపాల్ కు ఊరట లభించింది. ఆయన ఎన్నిక చెల్లందంటూ వేసిన పిటిషన్ ను కోర్టు కొట్టివేసింది. లగడపాటి ఎన్నికల సమయంలో తప్పుడు అఫిడవిట్ దాఖలు చేశారంటూ న్యాయవాది సుంకర కృష్ణమూర్తి కోర్టులో పిటిషన్ వేశారు. దీనిపై విచారణ జరిగిన అనంతరం ఈ పిటిషన్ ను ధర్మాసనం కొట్టివేసింది.