నిండు సభలో చంద్రుడిని నిలదీస్తా

Posted: 08/13/2014 12:45 PM IST

అధికారంలో ఉన్న చంద్రబాబు తమ పార్టీ నేతలను చంపుకుతింటున్నారని జగన్ మండిపడుతున్నారు. టిడిపి ప్రభుత్వం ఏర్పడ్డాక వైసీపీ నేతలు, కార్యకర్తలపై దౌర్జన్యాలు, దాడులు పెరిగాయని ద్వజమెత్తారాయన. కృష్ణా జిల్లా గొట్టుముక్కల గ్రామంలో హత్యకు గురైన కృష్ణారావు కుటుంబాన్ని జగన్ పరామర్శించారు. కుటుంబ సభ్యులను ఓదార్చారు. కృష్ణారావు హత్యకు గల కారణాలను అడిగి తెలుసుకున్నారు. కుటుంబానికి అండగా ఉంటానని భరోసా ఇచ్చారు. కార్యకర్తలు ఎవరూ అదైర్య పడవద్దని తాను వారి ప్రాణాలకు అడ్డుపడతానని చెప్పారు జగన్. కేవలం ఓటు వేయలేదనే కోపంతో ఇంట్లోకి వెళ్ళి అతి దారుణంగా హత్య చేశారని ఆవేదన వ్యక్తం చేశారు. కుటుంబ సభ్యులు ప్రాధేయపడుతున్నా కనికరం లేకుండా కళ్ళెదుటే ప్రాణాలు తీయటం హేయమైన చర్యగా జగన్ బాధపడ్డారు.

కృష్ణా జిల్లాలో గతంలోనూ దేశం నేతలు వైసీపీపై దాడులు చేశారని జగన్ ఉదాహరణలు వివరించారు. ఇంతకుముందు ఓ వైసీపీ కార్యకర్త నెత్తిపై బాంబు పెట్టి దారుణంగా చంపారని గుర్తు చేశారు. టిడిపి నేతల చేతిలో చాలామంది వైసీపీ కార్యకర్తలు హత్యకు గురయ్యారని చెప్పారు. ఎన్ని దాడులు జరుగుతున్నా పోలిసులు మాత్రం స్పందించటం లేదని ఆరోపణలు చేశారు. ఖాఖీలు కూడా పరోక్షంగా అధికారపార్టీకి సహకరిస్తున్నారని దుయ్యబట్టారు. పరిస్థితి ఇలాగే ఉంటే తీవ్ర పరిణామాలు తప్పవని హెచ్చరించారు. కార్యకర్తలు అప్రమత్తంగా ఉండాలని సూచించారు.

దాడులు చేస్తున్నవారిపై చర్యలు తీసుకోపోవటం మంచిపద్దతి కాదని జగన్ అన్నారు. ఇలా చేస్తే వారిని మరింత ప్రోత్సహించినట్లవుతుందన్నాు. నిందితులపై చర్యలు తీసుకోవాలని డిమాండ్ చేశారు. చంద్రబాబుకు మానవత్వమే లేదని మండిపడ్డారు. దాడుల గురించి అసెంబ్లీలో నిలదీస్తానని స్పష్టం చేశారు. తమ ప్రశ్నలకు ప్రభుత్వం సమాధానం చెప్పక తప్పదన్నారు. టిడిపి ప్రభుత్వ ప్రజా వ్యతిరేక విధానాలపై తాము ఎప్పుడూ పోరాడుతామన్నారు. రాజన్న కన్న కలలను నిజం చేయటం కోసం కృషి చేస్తానని ప్రజలకు జగన్ హామి ఇచ్చారు.

కార్తిక్