మా ఫలితాలకు కోర్టు గ్రీన్ సిగ్నల్... కళ్యాణ్ కు రూ.10 వేలు జరిమానా

Posted: 04/15/2015 11:49 AM IST

Line clearance for maa elections results

ఎప్పుడెప్పుడా అని ఎదురుచూస్తున్న మూవీ ఆర్టిస్ట్ అసోసియేషన్ ‘మా’ ఎన్నికల ఫలితాలు మరికొద్ది గంటల్లో విడుదల కానున్నాయి. తాజాగా హైకోర్టు గ్రీన్ సిగ్నల్ ఇచ్చేసింది. ఒ. కళ్యాణ్ వేసిన పిటీషన్ ను కోర్టు కొట్టివేసింది. ‘మా’ అధ్యక్ష ఎన్నికలు మార్చి 29న జరిగిన విషయం తెలిసిందే. నటులు జయసుధ, రాజేంద్రప్రసాద్ లు అధ్యక్ష పదవికోసం పోటీ చేసారు.

ఈ ఎన్నికల ఫలితాలు విడుదల కాకుండా ఒ.కళ్యాణ్ కోర్టులో పిటీషన్ వేసిన విషయం తెలిసిందే. దీంతో ఈ ఫలితాల విడుదలను గతకొద్ది రోజులుగా కోర్టు వాయిదా వేస్తూ వస్తుంది. నేడు(ఏప్రిల్ 15) కోర్టు ఈ కేసుపై తుది నిర్ణయం ప్రకటించింది. ఈ ఫలితాల విడుదలను ప్రకటించుకోవచ్చునని, అలాగే ఒ.కళ్యాణ్ కు రూ.10వేలు జరిమానా విధిస్తున్నట్లుగా కోర్టు తీర్పునిచ్చింది.

అయితే ఈ ఫలితాల విడుదల ప్రస్తుతం రిటర్నింగ్ అధికారి చేతిలో వున్నాయి. ఈ అధికారి త్వరలోనే ఈ ఫలితాలను విడుదల చేయనున్నారు. మొత్తానికి ‘మా’ ఎన్నికల ఫలితాల కేసు సుఖాంతం అవడంతో... ‘మా’ సభ్యుల్లో కాస్త ఆనందం కనిపిస్తుంది. మరింతం ఆనందం ఫలితాలు వచ్చిన తర్వాత చూడవచ్చు. మరిన్ని అప్ డేట్స్ ఎప్పటికప్పుడు మీకు అందిస్తూనే వుంటాం. చూస్తూనే వుండండి తెలుగు విశేష్.