సంక్రాంతికే ఎన్టీఆర్ ‘నాన్నకు ప్రేమతో’ విడుదల

Posted: 11/12/2015 09:56 AM IST

యంగ్‌టైగర్‌ ఎన్టీఆర్ హీరోగా యువ క్రేజీ డైరెక్టర్ సుకుమార్‌ దర్శకత్వంలో రూపొందుతున్న చిత్రం ‘నాన్నకు ప్రేమతో’. రిలయన్స్‌ ఎంటర్‌టైన్‌మెంట్‌ సమర్పణలో శ్రీ వెంకటేశ్వర సినీచిత్ర పతాకంపై బి.వి.ఎస్‌.ఎన్‌.ప్రసాద్‌ నిర్మిస్తున్న ఈ చిత్ర టీజర్‌ ఇటీవలే దసరా కానుకగా విడుదల చేశారు. ఈ టీజర్‌కి ట్రెమండస్‌ రెస్పాన్స్‌ వచ్చింది. అయితే తాజాగా దీపావళి కానుకగా ఈ చిత్రానికి సంబంధించిన పోస్టర్‌ను విడుదల చేశారు.

ఈ పోస్టర్ కు కూడా మంచి రెస్పాన్స్ వస్తోంది. ఇందులో ఎన్టీఆర్ చాలా స్టైలిష్ గా కనిపిస్తున్నాడు. అయితే ఈ సంధర్భంగా చిత్ర నిర్మాత బి.వి.ఎస్‌.ఎన్‌.ప్రసాద్‌ మాట్లాడుతూ... విజయదశమి కానుకగా విడుదలైన ‘నాన్నకు ప్రేమతో’ టీజర్‌కు ప్రపంచ వ్యాప్తంగా ట్రెమండస్‌ రెస్పాన్స్ వచ్చింది. అలాగే దీపావళి కానుకగా విడుదల చేసిన పోస్టర్ కు కూడా మంచి రెస్పాన్స్ వస్తోంది. లండన్‌లో ఈ చిత్రానికి సంబంధించి 60 రోజులపాటు ఓ భారీ షెడ్యూల్‌ చేసిన విషయం తెలిసిందే. ఈ షెడ్యూల్‌లో తీసిన సీన్స్‌ అన్నీ చాలా ఎక్స్‌ట్రార్డినరీగా వచ్చాయి. ప్రస్తుతం హైదరాబాద్‌లో షెడ్యూల్‌ జరుగుతోంది. నవంబర్‌ 19 నుంచి స్పెయిన్‌లో 20 రోజులపాటు చివరి షెడ్యూల్‌ జరుగుతుంది. దీంతో టోటల్‌గా షూటింగ్‌ పూర్తవుతుంది. సంక్రాంతి కానుకగా ప్రపంచ వ్యాప్తంగా మా ‘నాన్నకు ప్రేమతో’ చిత్రాన్ని విడుదల చేయడానికి ప్లాన్‌ చేస్తున్నాం అని చెప్పుకొచ్చారు.

యంగ్‌టైగర్‌ ఎన్టీఆర్‌ సరసన రకుల్‌ ప్రీత్‌ సింగ్‌ హీరోయిన్‌గా నటిస్తోంది. ఈ చిత్రంలో జగపతిబాబు, రాజేంద్రప్రసాద్‌, రాజీవ్‌ కనకాల, అవసరాల శ్రీనివాస్‌, సితార, అమిత్‌, తాగుబోతు రమేష్‌, గిరి, నవీన్‌ తదితరులు నటిస్తున్నారు. ఈ చిత్రానికి సంగీతం: దేవిశ్రీప్రసాద్‌, ఫోటోగ్రఫీ: విజయ్‌ చక్రవర్తి, ఆర్ట్‌: రవీందర్‌, ఫైట్స్‌: పీటర్‌ హెయిన్స్‌, ఎడిటింగ్‌: నవీన్‌ నూలి, పాటలు: చంద్రబోస్‌, డాన్స్‌: రాజు సుందరం, శేఖర్‌, ఎగ్జిక్యూటివ్‌ ప్రొడ్యూసర్‌: సుధీర్‌, నిర్మాత: బి.వి.ఎస్‌.ఎన్‌.ప్రసాద్‌, కథ, స్క్రీన్‌ప్లే, దర్శకత్వం: సుకుమార్‌.