Posted: 03/20/2013 06:51 PM IST

ఈనెల 21న తెలంగాణ జేఏసీ తలపెట్టిన సడక్‌బంద్‌కు అనుమతి లేదని ముఖ్యమంత్రి కిరణ్‌కుమార్‌రెడ్డి ప్రకటించారు.  సడక్‌బంద్‌పై పోలీసుల పని పోలీసులు చేస్తారని, నిబంధనల ప్రకారమే ఎదుర్కుంటామని సీఎం తెలిపారు. బాబ్లీ ప్రాజెక్టు విషయంలో రాష్ట్రానికి అన్యాయం జరగనీయమని సీఎం స్పష్టం చేశారు. అసెంబ్లీలో అవిశ్వాసంపై జరిగిన ఓటింగ్‌లో గీత దాటిన ఎమ్మెల్యేలపై సీఎల్పీలో చర్చిస్తామన్నారు.ఓటింగ్ సమయంలో గైర్హాజరుపై మంత్రి వట్టి వసంత్‌కుమార్ వివరణ ఇచ్చినట్లు ఆయన తెలిపారు. అసెంబ్లీలో ప్రవేశపెట్టింది వ్యవసాయ ప్రత్యేక బడ్జెట్ కాదని కార్యాచరణ ప్రణాళికే అని సీఎం వివరించారు. ఈ విషయంలో ప్రతిపక్షాలు రాద్దాంతం చేయడం తగదన్నారు. సాంకేతిక పొర పాటు జరిగిందని, దానికి ఎవరూ బాధ్యులు కారని అన్నారు. విద్యుత్ చార్జీల పెంపుపై ఈఆర్సీ ప్రతిపాదనలను మంత్రి వర్గ ఉపసంఘం పరిశీలిస్తుందని సీఎం కిరణ్‌కుమార్ రెడ్డి చెప్పారు.