Posted: 06/23/2012 12:52 PM IST

మన అభిప్రాయాలను తెలియచేయడానికి గట్టిగా అరవాల్సిన పని లేదని మాస్టర్ బ్లాస్టర్ సచిన్ తెండూల్కర్ స్పష్టం చేశాడు. రాజ్యసభ సభ్యుడిగా ఇటీవల పదవీ స్వీకారం చేసిన సచిన్ ఒక టీవీ చానెల్‌కు ఇచ్చిన ఇంటర్వ్యూలో మాట్లాడుతూ, పెద్దగా అరిస్తేనే అభిప్రాయాలను ప్రకటించినట్టు కాదని వ్యాఖ్యానించాడు. రాజ్యసభ సభ్యుడిగా తన బాధ్యతలను సమర్థంగా నిర్వర్తిస్తానని, అయితే, అరవడం తనకు అలవాటు లేదని, సవ్యం గానే చెప్తానని అన్నాడు. బహుశా తనను అరిపించాలని ఎవరూ కోరుకోరని చెప్పాడు. ఒక ప్రశ్నకు సమాధానమిస్తూ లండన్ ఒలింపిక్స్‌లో భారత్‌కు చెప్పుకోదగిన పతకాలు లభిస్తాయని అన్నాడు. భారత బృందం విజయాలను సాధించి, పతకాలు గెల్చుకోవాలని భగవంతుడ్ని ప్రార్ధిస్తానని సచిన్ చెప్పాడు. అయితే, పతకాలు వచ్చాయా లేదా అన్నది ముఖ్యం కాదని అన్నాడు. శక్తివంచన లేకుండా కృషి చేస్తే పతకాలు లభించకపోయినా ఆత్మ సంతృప్తి కలుగుతుందని అన్నాడు. టెస్టు క్రికెట్‌లో డే/నైట్ మ్యాచ్‌లకు తాను వ్యతిరేకం కాదని సచిన్ స్పష్టం చేశాడు. అయితే, ఈ విధానాన్ని నేరుగా టెస్టుల్లో ప్రవేశపెట్టే కంటే ముందు ఫస్ట్‌క్లాస్ మ్యాచ్‌లలో ప్రయోగాత్మకంగా అమలు చేయాలని సూచించాడు.