రాయల్స్ రాజసం ఉట్టిపడుతోంది

Posted: 09/30/2013 02:57 PM IST

ఛాంపియన్స్ లీగ్ టి20లో  రాజస్థాన్ రాయల్స్ జట్టు తన హవాను కొనసాగిస్తుంది. గ్రూప్ ఏలో ఉన్న ఈ జట్టు వరుస విజయాలతో దూసుకుపోతూ... వేరే జట్ల సమీకరణాలతో సంబంధం లేకుండా సెమీస్ బెర్త్ ను ఖరారు చేసుకుంది. ఇప్పటి వరకు ఆడిన మూడు మ్యాచ్ ల్లో ఒక్క మ్యాచ్ కూడా ఓడిపోకుండా అగ్ర స్థానంలో నిలిచిన రాజస్థాన్ మరో మ్యాచ్ మిగిలి ఉండగానే సెమీస్ లో అడుపెట్టింది.

నిన్న వాయ్ మాన్‌ సింగ్ స్టేడియంలో జరిగిన మ్యాచ్‌లో ద్రవిడ్ సేన 9 వికెట్ల తేడాతో పెర్త్ స్కార్చర్స్‌ను చిత్తు చేసింది. టాస్ గెలిచిన రాజస్థాన్ బౌలింగ్ ఎంచుకోగా... పెర్త్ 20 ఓవర్లలో 120 పరుగులకు ఆలౌటయింది. వోజస్ (27) టాప్ స్కోరర్. రాజస్థాన్ బౌలర్లు కూపర్ (4/18), తాంబె (2/17), ఫాల్కనర్ (2/16) పొదుపుగా బౌలింగ్ చేశారు. ఈ ముగ్గురూ కలిసి 12 ఓవర్లలో కేవలం 51 పరుగులు మాత్రమే ఇచ్చి ఏడు వికెట్లు తీశారు. రాజస్థాన్ రాయల్స్ జట్టు 16.3 ఓవర్లలో వికెట్ నష్టానికి 121 పరుగులు చేసి అలవోకగా గెలిచింది.

ద్రవిడ్ (0) నిరాశపరిచినా... రహానే (53 బంతుల్లో 62 నాటౌట్; 5 ఫోర్లు, 2 సిక్సర్లు), శామ్సన్ (42 బంతుల్లో 50 నాటౌట్; 6 ఫోర్లు, 1 సిక్సర్) కలిసి రెండో వికెట్‌కు 120 పరుగులు జోడించి జట్టుకు ఘన విజయాన్ని అందించారు. కూపర్‌కు ‘మ్యాన్ ఆఫ్ ద మ్యాచ్ ’ అవార్డు లభించింది.