దిగజారిపోయిన సైనా నెహ్వాల్..

Posted: 04/09/2015 03:53 PM IST

Saina drops to world no 2 in womens singles ranking

ఇండియన్ బ్యాడ్మింటన్ స్టార్ సైనా నెహ్వాల్ ఇటీవలే మహిళల సింగిల్స్ బ్యాడ్మింటన్లో ప్రపంచ నెంబర్ 1 ర్యాంకును కైవసం చేసుకుని సంచలన రికార్డు సృష్టించిన విషయం తెలిసిందే! ప్రపంచ చాంపియన్ కరొలినా మారిన్ గత నెలలో ఇండియన్ ఓపెన్ సూపర్ సిరీస్ సెమీఫైనల్లో ఒటమి పాలవ్వడంతో సైనా నెహ్వాల్ ఆ నెంబర్ 1 స్థానాన్ని దక్కించుకోగలిగింది. అంతేకాదు.. ఆల్ ఇంగ్లండ్ ఓపెన్ సిరీస్ లో ఫైనల్ కి చేరిన తొలి భారతీయ మహిళగా ఈమె రికార్డు నమోదు చేసింది. అలాగే ఇండియా ఓపెన్ టైటిల్ ని గెలుచుకోగలిగింది. దీంతో ఈమె మొదటి ర్యాంకును పొందింది. దీంతో ఆ ఘనత సాధించిన తొలి భారతీయ క్రీడాకారిణిగా రికార్డు స్థాపించింది.

అయితే.. ఈ రికార్డు ఎన్నోరోజుల వరకు నిలవలేదు. తాజాగా ఈ అమ్మడు రెండో స్థానానికి దిగజారిపోయినట్లు తేలింది. ఈ విషయాన్ని తాజాగా బ్యాడ్మింటన్ వరల్డ్ ఫెడరేషన్ ((బీడబ్ల్యూఎఫ్) అధికారికంగా ప్రకటించింది. మియామీ ఓపెన్ సిరీస్ లో భాగంగా సెమీ ఫైనల్ లో ఒలంపిక్ ఛాంపియన్ చైనా క్రీడాకారిణి లీ ఝౌరీ చేతిలో సైనా నెహ్వాల్ ఓడిపోయిన సంగతి విదితమే! ఆ ఓటమితోనే సైనా నెహ్వాల్ 2 ర్యాంకుకు చేరింది. ఇక తాజాగా సింగపూర్ ఓపెన్ లో పాల్గొనకుండా సైనా విరామం తీసుకుంది. సైనా నెహ్వాల్ ఒక్కసారిగా ఇలా 2 ర్యాంకుకు దిగజారిపోవడంతో ఇండియన్ అభిమానులు నిరాశ వ్యక్తం చేస్తున్నారు.

ఇదిలావుండగా.. గురువారం (బీడబ్ల్యూఎఫ్) ప్రకటించిన ర్యాంకుల్లో పురుషుల సింగిల్స్ స్పెషలిస్ట్ తెలుగు తేజం కిడాంబి శ్రీకాంత్ వరల్డ్ నంబర్ 4 పొజిషన్లో ఉన్నారు. ప్రణయ్ 14వ ర్యాంకులో, రెండు ర్యాంకులు మెరుగు పర్చుకున్న పారుపల్లి కాశ్యప్ 15వ స్థానంలో కొనసాగుతున్నారు. మహిళల డబుల్స్ ర్యాంకింగ్స్లో గుత్తా జ్వాలా, అశ్విని పొన్నప్ప జోడికి 18వ ర్యాంకు దక్కింది. కాగా పురుషుల డబుల్స్లో టాప్-25 ర్యాంకుల్లో భారతీయ క్రీడాకారులెవరికీ చోటుదక్కలేదు. గాయంతో బాధపడుతున్న మరో క్రీడాకారిణి పివి సింధు 9వ ర్యాంకులో కొనసాగుతోంది.