Posted: 04/04/2013 03:03 PM IST

కేంద్రమంత్రి  పురందేశ్వరికి  హిందుస్థాన్ జింక్  పరిశ్రమ యాజమాన్యం షాకిచ్చింది.  త్వరలో జింక్ పరిశ్రమను మూసివేసే పనిలో  యాజమాన్యం ఉందని  కార్మికులు అంటున్నారు.   ఈ విషయంలో   పురందేశ్వరికి  జింక్ పరిశ్రమ యాజమాన్యం మధ్య జరిగే చర్చలు విఫలమయ్యనట్లు తెలుస్తోంది.  అంతేకాకుండా  పురందేశ్వరిని  కంపెనీలోకి రాకుండా గేట్లు మూసివేసినట్లు సమాచారం.  హిందుస్థాన్ జింక్ కర్మాగారం యాజమాన్యం కార్మికులను లోపలకు రానివ్వకుండా ప్రధాన ద్వారాన్ని మూసివేసేందుకు యత్నించింది. వెంటనే కార్మికులు ఆందోళనకు దిగడంతో వెనక్కి తగ్గింది. తిరిగి గేట్లను తెరిచింది. అయితే అర్ధరాత్రి నుంచి గేట్లు మూసేందుకు యాజమాన్యం నిర్ణయం తీసుకున్నట్టు కార్మిక వర్గాలు చెబుతున్నాయి. ఈ నేపథ్యంలో పెద్దఎత్తున ఆందోళన చేపట్టేందుకు కార్మిక కుటుంబాలు సన్నద్ధమవుతున్నాయి. కార్మికులు విధులకు హాజరయ్యేందుకు లోపలకు వెళుతుండగా రావద్దంటూ యాజమాన్య ప్రతినిధులు గేట్లను మూసేశారు. ఏడాదిగా పరిశ్రమలో ఉత్పత్తిని నిలిపివేసిన యాజమాన్యం నాలుగైదు నెలలుగా కార్మికులకు జీతాలు కూడా ఇవ్వడం లేదు.

అయినప్పటికీ కార్మికులు విధులకు హాజరవుతున్నారు. కార్మికులకు యాజమాన్యం మంచినీరు, రవాణా, క్యాంటీన్ తదితర సదుపాయాలను నిలిపివేసింది. జింక్ పరిశ్రమను తెరిపించేందుకు యాజమాన్యంతో గత నెల 20న ఢిల్లీలో కేంద్ర గనుల శాఖా మంత్రి సమక్షంలో కేంద్ర మంత్రి పురందేశ్వరి, విశాఖ పశ్చిమ ఎమ్మెల్యే మళ్ల విజయప్రసాద్, జిల్లా కార్మిక శాఖ అధికారులు చర్చలు జరిపారు. కానీ ఈ చర్చలకు విఘాతం కలిగిస్తూ జింక్ యాజమాన్యం ఏకంగా గేట్లు మూసివేసేందుకు యత్నించింది. ఈ విషయాన్ని పురందేశ్వరి, ఎమ్మెల్యే మళ్లలు గనుల మంత్రికి తెలియజేశారు.