అందరికీ అదర్శంగా ఉండాలి?

Posted: 05/02/2013 06:27 PM IST

 

సమాజంలోని ప్రతి ఒక్కరూ సాధారణ విధులతో పాటు సామాజిక ధృక్ఫధాన్ని పెంపొందించుకోవాలని డైరక్టర్‌ జనరల్‌ అఫ్‌ పోలీసు దినేష్‌ రెడ్డి అన్నారు. విశాఖ నగరంలోని సీతమ్మధార నార్త్‌ ఎక్స్‌టెన్షన్‌ లో గల పాపాహోమ్‌ బాలికల వసతి గృహాన్ని ఆయన ప్రారంభించారు. ఈ సందర్భంగా ఆయన మాట్లాడుతూ పోలీసు అధికారుల ఆధ్వర్యవంలో నడుస్తున్న పాపాహోమ్‌ ( పబ్లిక్‌ అండ్‌ పోలీసు అసోసియేషన్‌ ఫర్‌ స్ట్రీట్‌ చిల్డ్రన్‌ ) ఇప్పటి వరకూ బాలురకే వసతి గృహాన్ని నిర్వహిస్తోందని, అయితే బాలికలకు సైతం ప్రత్యేక వసతి గృహాన్ని ఏర్పాటు చేయాలనే తలంపుతో విశాఖ పట్నం పోలీసు వ్యవస్ధ దీన్ని నెలకొల్పి దేశంలోని పోలీసు వ్యవస్ధకు విశాఖపోలీసులు అదర్శంగా నిలిచారన్నారు.

నిత్యం ఒత్తిళ్ళతో సతమతమయ్యే పోలీసులు సామాజిక భాద్యతగా వీధి బాలలకు ఆశ్రయాన్ని కల్పించి వారిని ఉత్తమ పౌరులుగా తీర్చిదిద్దడం ఎంతో అభినందనీయమన్నారు. పాపాహోమ్‌ బాలుర విభాగంలో ఆశ్రయం పొందిన విద్యార్ధులు అద్వితీయ ప్రతిభను కనపరుస్తూ విద్యా పరంగా ఉన్నత ఫలితాలు సాధించడం వెనుక వారి కృషి, నిర్వాహకుల శ్రమ కన్పిస్తోందన్నారు. ప్రస్తుతం బాలికలకు కూడా ప్రత్యేక వసతి గృహాన్ని ఏర్పాటు చేయడంతో వీరు ఎందరికో ఆదర్శంగా మారారన్నారు.

ప్రజల సహకారం మరింతగా అందించాలని, తద్వారా వీధుల వెంట తిరుగాడే బాలలు దేశం మెచ్చదగిన పౌరులుగా మారాలన్న అభిప్రాయాన్ని ఆయన వ్యక్తం చేసారు. రెండు రోజుల నగర పర్యటనకు వచ్చిన ఆయన నగరంలో పలు కార్యక్రమాల్లో పాల్గొన్నారు. ఈ పర్యటనలో డీజీపీ వెంట నగర పోలీసు కమిషనర్‌ శివధర్‌ రెడ్డి, విశాఖ రేంజ్‌ డిఐజి స్వాతి లక్రా, రూరల్‌ ఎస్పీ శ్రీనివాసరావు తదితర పోలీసు ఉన్నతాధికారులు పాల్గొన్నారు