Posted: 12/12/2011 12:28 PM IST

నిరసనలు ఎక్కడైనా చూపించవచ్చు!  భక్త రామదాసు తనను రక్షించటానికి రానందుకు తన ఇష్టదైవాన్నే దూషించాడు.! ఆధ్యాత్మిక కేంద్రాల్లోనూ విబేదాలు తలెత్తవచ్చు.  మఠాలు, మఠాదిఫతుల మీద తిరుమల తిరుపతి దేవస్థానం, తితిదే మీద పీఠాధిపతులు పరస్పరం విమర్శలను చిందించటం కొన్నాళ్ళుగా సాగుతూనేవుంది. మఠాలకు కేటాయించిన భూముల్లో అనుమతులను అధిగమించి నిర్మాణాలు చేసారని, వాటిని వ్యాపరపరంగా వాడుకుంటున్నారని దేవస్థానం యాజమాన్యం ఆరోపిస్తే, ఆధ్యాత్మిక కేంద్రాలైన దేవాలయాలు వ్యాపార కేంద్రాలుగా మారాయని ఆ మధ్య శారదా పీఠాధిపతి విమర్శిస్తే తాజాగా, మన దేవాస్థానాలు క్లబ్బులుగా మారాయని త్రిదండి జియ్యర్ స్వామి వ్యాఖ్యానించారు.  దీనితో దేవస్థానం యాజమాన్యం, సిబ్బంది మఠాధిపతుల మీద నిరసనలు ప్రదర్శిస్తున్నారు.  మఠాధిపతికి అలా మాట్లాడటం తగదని ఆక్షేపిస్తున్నారు.  వెయ్యి కాళ్ళ మండపం మీద కక్షను ఇలా వెళ్ళబుచ్చుతున్నారని విమర్శిస్తున్నారు.

మఠాధిపతి కాబట్టి ఆయనేమీ అనగూడదు. సామాన్య ప్రజలకు ఏమైనా మాట్లాడే హక్కుంది అని అనటం కూడా సరైనది కాదేమో!  క్లబ్ అనేదానికి విపరీతార్థం తీయాల్సిన అవసరం ఉందా?  వినోదం కోసం వచ్చి అందుకు రుసుము చెల్లించే కేంద్రాలే క్లబ్బులు.  ఆలయ వ్యవస్థలో కూడా జమ, ఖర్చులను మాత్రమే చూస్తున్నప్పుడు, సామాజిక బాధ్యతలను తీసుకోనప్పుడు వాటిని వ్యాపార కేంద్రాలుగానే పరిగణిస్తారు.  ఎందరో శిష్యులకు ఆధ్యాత్మిక గురువులుగా చెలామణి అవుతున్నప్పుడు ఆధ్యాత్మిక కేంద్రాలలోని సమస్యల మీద స్పందించటంలో కూడా, ఈ మాటలు అనకూడదు, అలా మాట్లాడకూడదు అని అంటే ఎలా? 

దొంగతనాలు, మోసాలు, అవినీతి, ఆరోపణలు, అధికారం, ఆదాయాలకోసం పోటీలు, అక్రమాలు ఎక్కడా జరగకూడదు.  ఆధ్యాత్మిక కేంద్రాల్లోనే కాదు, సమాజంలో ఎక్కడ జరిగినా సమాజ శ్రేయస్సులో అది మంచిది కాదు.  అలాగే మఠాధిఫతులు మంచి మాటలే మాట్లాడాలన్నది నిజమే అయినా, వారికి చెడు అని అనిపించినదాన్ని కూడా 'చెడు' అని అనవద్దంటే ఎలా?  ఎప్పుడూ సత్యాన్నే పలుకుతూ దైవచింతనలోనూ భక్తి ప్రచారంలోనూ జీవితాన్ని గడపవలసిన గురువులచేత ఆ విధంగా మాట్లాడాల్సిన అవసరం కల్పించామే అనే దిశగా ఆలోచిస్తే వీరు, సహనం చూపిస్తూ వారు వ్యవహరిస్తే అసలు గొడవలే రావు,  భక్తుల మనోవేదనకూ దారితీయదు.   

-శ్రీజ