Posted: 12/12/2011 01:21 PM IST

ఫెమినా, ఎకానామిక్ టైమ్స్, ది ఇలస్ట్రేటెడ్ వీక్లీలకు కార్టూన్లు వేసిన గోవాకు చెందిన ప్రఖ్యాత కార్టూనిస్ట్ మారియో మిరందా పనాజీలో నిన్న తన స్వగృహంలో మరణించారు.  85 సంవత్సరాల మారియో భార్య ఇద్దరు కుమారులను వదిలి నిద్రలోనే శాశ్వత నిద్రలోకి వెళ్ళిపోయారు. తన కార్టూన్లతో పాఠకులను ఆలోచింపజేసారు.  ఆయన సృష్టించిన మిస్ నింబూ పానీ, మిస్ ఫోన్సేకా, ఖుష్వంత్ సింగ్ డ్రింకింగ్ పాత్రలు విశేష జనాదరణను పొందాయి.  మారియో ప్రతిభను గుర్తించిన భారత ప్రభుత్వం ఆయనకు 1988 లో పద్మశ్రీ, 2002 లో పద్మభూషణ్ బిరుదులను ప్రదానం చేసింది.  ఆయన పార్థివ శరీరానికి ఈరోజు అంత్యక్రియలు జరుపుతున్నారు. 

1926లో జన్మించిన మారియో చిత్రకళమీద ఉన్న ఆసక్తితో తన ఇంటి గోడలను రంగులతో నింపేవారట.  అది చూసి ఆయన తల్లి ఆయనకు పుస్తకాలను కొనిచ్చారట.  ఎటువంటి శిక్షణా తీసుకోకుండానే మారియో చిన్నతనం నుంచీ చిత్రలేఖనం ద్వారా అందరినీ అలరించేవారు.   ఆయన ఖర్చులకు కావలసిన సొమ్ముని సంపాదించుకునేవారు.  ఐఏఎస్ అవుదామనుకుని, ఎడ్ ఏజెన్సీలో కాలుపెట్టి చివరకు కార్టూనిస్ట్ అయిన మారియో విదేశాల్లో కూడా తన ప్రతిభను చాటారు.  లండన్ లో ఉన్న 5 సంవత్సరాల్లో వివిధ పత్రికలకు చిత్రాలను గీసిన మారియో లిలిపుట్, మాడ్, పంచ్ లాంటి అంతర్జాతీయ పత్రికలకు కూర్టూన్లు వేసారు.  1980లో మాతృదేశానికి తిరిగివచ్చి, భారత్ లోనే నివాసం ఏర్పరచుకున్నారు.  ఆ తర్వాత ఎన్నో ప్రఖ్యాత పుస్తకాలకు చిత్రాలనిచ్చారు. 

సంగీత ప్రియుడు, పర్యటకుడు అయిన మారియో హబీబా హైదెరి అనే ఒక కళాకారిణినే పెళ్ళిచేసుకున్నారు.  వారికి కలిగిన సంతానంలో రాహుల్ న్యూయార్క్ లో హెయిర్ స్టైలిస్ట్, రిషద్ గోవాలోనే తండ్రిలా కార్టూనిస్ట్. 

మారియో మిరాందా మృతికి ఎందరో కళాకారులు, పత్రకారులు, రచయితలు ప్రగాఢ సంతాపాన్ని వెలిబుచ్చారు.

-శ్రీజ