Posted: 05/07/2012 01:50 PM IST

మెడికల్ షాప్‌కెళ్లి మందులు కొనుక్కున్నంత సులభంగా.. శ్వాసనాళం, ముక్కు, ధమనులు.. ఇలా శరీర భాగాలను కొనుక్కొనే వీలుంటే ఎంత బాగుణ్నో కదూ. ప్రస్తుతం తాము ఆ పనిలోనే ఉన్నామని యూకేలోని యూనివర్సిటీ కాలేజ్ లండన్ శాస్త్రజ్ఞులు ప్రకటించారు. శరీరంలో అవయవాలు పనిచేయమని మొరాయించినప్పుడు.. వాటి ని మార్చడమే మందు. కానీ, అవయవ దానం విషయంలో ఉన్న అనేక ఇబ్బందుల వల్ల ప్రస్తుతం చాలామంది రోగులు నానా సమస్యలతో సతమతమవుతున్నారు.

ఈ ఇబ్బందిని అధిగమించేందుకు వారు పరిశోధనలు చేపట్టారు. రోగుల శరీరకణాల సాయంతో ప్రయోగ శాలలో కృత్రిమ అవయవాల సృష్టికి కృషి చేస్తున్నారు. తమ పరిశోధనలు ఫలిస్తే.. అవయవదానం గతజ్ఞాపకంగా మారడానికి మరెన్నో రోజులు సమయం పట్టదని ఈ ప్రాజెక్టుకు నేతృత్వం వహిస్తున్న ప్రొఫెసర్ అలెగ్జాండర్ సెఫాలియన్ అన్నారు.