Posted: 06/25/2012 05:09 PM IST

తెలుగుదేశం పార్టీ అధ్యక్షుడు చంద్రబాబు నాయుడు ఇవాళ విజయవాడలో ఉన్న దుర్గ గుడి వద్ద ‘‘ఫ్లై ఓవర్’’ నిర్మాణం చేపట్టాలని మహా ధర్నా చేపట్టిన విషయం తెలిసిందే. ఈ ధర్నాకి తెలుగు దేశం పార్టీ నేతలు, కార్యకర్తలు భారీ సంఖ్యలో పాల్గొన్నారు. కానీ జూనియర్ ఎన్టీఆర్ స్నేహితుడు, గుడివాడ ఎమ్మెల్యే కొడాలి నాని, నూజివీడు తెదేపా శాసనసభ్యులు చిన్నం రామకోటయ్యలు మాత్రం ఈ ధర్నాలో పాల్గొనక పోవడం పెద్ద దుమారాన్నే రేపుతుంది.

గత కొంత కాలంగా వీరిద్దరు వైయస్సార్ కాంగ్రెస్ పార్టీలో చేరుతారన్న ఊహాగానాలు ఉన్నాయి. వీటిని నిజం చేస్తూ నాని ఇవాళ జరిగిన మహా ధర్నాలో పాల్గొనకపోవడం చూస్తుంటే ఆ వార్తలకు బలం చేకూరినట్లేనంటున్నారు. అయితే నాని ఏమైనా పనిమీద బిజీగా ఉండి పాల్గొనలేదా ? లేక పార్టీ అధినేత మీద ఉన్న అసంతృప్తితో పాల్గొనలేదా అనే విషయం తెలియాల్సి ఉంది.