Posted: 09/03/2012 11:45 AM IST

ఆమె ఒక ప్రముఖ పాకిస్థానీ గాయని. పెళ్లి చేసుకుని కొత్త జీవితాన్ని ప్రారంభించడానికి అన్ని ఏర్పాట్లూ చేసుకుంది. సంతోషకరమైన రోజు (ఈ నెల 1) రానే వచ్చింది. గాయనీమణి పెళ్లి వేడుక చూడాలని ఎంతో మంది అభిమానులు, బంధువులు, సన్నిహితులు లాహోర్ నగరానికి ఉత్సాహంగా తరలివచ్చారు. సరిగ్గా రాత్రి 10.30కి పోలీసులు కూడా వచ్చారు. గాయని అన్నీఖాలిద్ వెంటనే షాక్‌కు గురై ఆస్పత్రిలో చేరాల్సి వచ్చింది. ఇంతకీ ఏం జరిగింది? పాకిస్థాన్ లోని పంజాబ్ రాష్ట్ర ప్రభుత్వ నిబంధనల ప్రకారం వివాహ వేడుకలను రాత్రి 10గంటలకు ముగించేయాలి.ఆ తర్వాత కూడా కొనసాగిస్తే అది నేరంగా పరిగణిస్తారు. గాయని ఖాలిద్ కల్యాణం ముగిసినా.. సంబరాలకు మాత్రం తెరపడలేదు. రాత్రి పది దాటినా కొనసాగుతూనే ఉన్నాయి. పోలీసులు రంగప్రవేశం చేశారు. ఖాలిద్ అభిమానులు, సన్నిహితులు వారితో వాదనకు దిగారు. దాడి చేసినంత పనిచేశారు. ఆనందకరమైన రోజున ఇలా జరిగేసరికి ఖాలిద్ స్పృహ తప్పి పడిపోయింది. ఆమె ను వెంటనే ఆస్పత్రికి తరలించారు. తమ జీవితంలో ముఖ్యమైన రోజును పోలీసులు ఇలా పాడు చేశారని, తన భార్య అవమాన భారాన్ని తట్టుకోలేకపోయిందని ఖాలిద్ భర్త మాలిక్‌నారజ్ ఆవేదన వ్యక్తం చేశారు.