నేను-కేసిఆర్ సమైక్యవాదులం

Posted: 08/19/2013 06:19 PM IST

ఎప్పుడు కేసిఆర్ మీద మండిపడే రెడ్డిగారు ఈరోజు ఏకంగా ఒక బాంబుపేల్చారు. నేను, కేసిఆర్ సమైక్యవాదులం అని మీడియా ముందు ప్రకటన చేశారు. మేము ఇరువురం ఎప్పటి నుండో సమైక్యవాదులమేనని సంగారెడ్డి శాసన సభ్యుడు, ప్రభుత్వ విప్ తూర్పు జగ్గా రెడ్డి అన్నారు. తాను ప్రత్యక్షంగా సమైక్యవాదని అయితే కెసిఆర్ పరోక్షంగా సమైక్యవాది అన్నారు. తెలంగాణ రావడం కెసిఆర్‌కు ఏమాత్రం ఇష్టం లేదన్నారు. విభజన జరిగితే ఆయనకు రాజకీయంగా మనుగడ ఉండదు కాబట్టే ఆయన వ్యతిరేకిస్తారని అభిప్రాయపడ్డారు. ఉద్యమానికి ఊపిరిగా నిలిచిన ఉస్మానియా, కాకతీయ విశ్వవిద్యాలయాల విద్యార్థులకు న్యాయం చేయాలని జగ్గారెడ్డి కోరారు. ఈ విషయమై తాను ఆంటోనీ కమిటీకి లేఖ రాసినట్లు చెప్పారు. అనేక ఏళ్లుగా జరుగుతున్న ఉద్యమాలలో విద్యార్థులను వాడుకొని వదిలేస్తున్నారని, వారికి న్యాయం జరగాలన్నారు. విద్యార్థుల సమస్యలపై చర్చకు రావాలన్నారు. అమరవీరుల కుటుంబాలకు పరిహారంతో పాటు ఉద్యోగం ఇవ్వాలని డిమాండ్ చేశారు. అయితే జగ్గారెడ్డి మాటలతో తెలంగాణ ప్రాంత నాయకుల్లో కొత్త అలజడి మొదలైంది. ఇటీవల కేసిఆర్ సీమాంద్రవాళ్లపై చేసిన కామెంట్స్ కూడా అలాగే ఉన్నాయి. అంతేకాకుండా రోజుకోక విధంగా కేసిఆర్ రంగులు మార్చుతున్న విషయం తెలంగాణ ప్రాంత నాయకులు గమనిస్తున్నారు. సీమాంద్ర ప్రజలు రెచ్చగొట్టే పనిలో భాగంగా కేసిఆర్, విహెచ్ ఉన్నారని రాజకీయనాయకులు అంటున్నారు. కేసిఆర్ మనసు కూడా సమైక్యవాదం కోరుకుంటుందని అందుకే అలా మాట్లాడుతున్నారని జగ్గారెడ్డి క్లారిటీగా చెప్పారు.