శిఖరాన్నంటిన ధావన్ దంచుడికి వరుణుడు అడ్డుకట్ట

Posted: 06/10/2015 12:47 PM IST

టీమిండియా, బంగ్లాదేశ్ క్రికెట్ జట్ల మధ్య టెస్టు క్రికెట్ మ్యాచ్ బుధవారం ఉదయం ప్రారంభమైంది. తొలుత బ్యాటింగ్ చేసేందుకు బరిలోకి దిగిన ఇండియా ఆటగాళ్లు శిఖర్ ధావన్, మురళి విజయ్ నిదానంగా ఇన్నింగ్స్ ప్రారంభించారు. తొలి రెండు ఓవర్లు స్లోగా ఇన్నింగ్స్ ప్రారంభించిన ఈ ఓపెనర్లు.. ఆ తర్వాత బంగ్లా బౌలర్ల మీద విరుచుకుపడ్డారు. ముఖ్యంగా ధావన్ శిఖరాన్నంటిన ఇన్నింగ్స్ తో మైదానంలో పరుగుల వర్షాన్ని కురిపించేశాడు. అతగాడు టెస్టు మ్యాచులో కాకుండా.. వన్డేను తలపించే విధంగా అద్భుతంగా తన బ్యాటుకు పనిచెప్పాడు. 47 బంతుల్లోనే అర్థసెంచరీ పూర్తి చేసుకున్నాడు.

ఇలా ఈ మ్యాచ్ రసవత్తరగా సాగుతున్న ఈ మ్యాచ్ కు వరుణుడు అడ్డుపడ్డాడు. 24వ ఓవర్ మొదలుకాగానే ప్రారంభమైన వర్షం.. అంతకంతకూ పెరగడంతో మరో మూడు బంతుల తర్వాత అంపైర్లు ఆటను నిలిపివేశారు. ఆట ఆగిపోయే సమయానికి భారత్ స్కోరు 23.3 ఓవర్లలో వికెట్ నష్టపోకుండా 107 పరుగులు చేసింది. ఓపెనర్ మురళీ విజయ్ 70 బంతుల్లో 4 ఫోర్ల సహాయంతో 33 పరుగులు చేయగా.. ధావన్ 71 బంతుల్లో 12 ఫోర్ల సహాయంతో 75 పరుగుల చేసి క్రీజులో వున్నాడు. ప్రస్తుతం పిచ్, మైదానంలో కొంత భాగాన్ని కవర్లతో కప్పి వుంచారు. వర్షం కారణంగా ఆగిన ఈ మ్యాచ్.. తిరిగి ఎప్పుడు ప్రారంభం అవుతుందోనన్న విషయమై సందిగ్ధత నెలకొంది.