అర్దరాత్రి హెచ్.సీ.యూకు రాహుల్.. బంద్ కు పిలుపునిచ్చిన ఏబీవీపీ

Posted: 01/30/2016 09:55 AM IST

Rahul gandhi came to hcu in the mid night

రాహుల్ గాంధీ హైదరాబాద్ సెంట్రల్ యూనివర్సిటీలో ఆత్మహత్య చేసుకున్న రోహిత్ వేములకు మద్దతుగా సామూహిక నిరాహార దీక్షలో సాల్గొనేందుకు యూనివర్సిటీకి చేరుకున్నారు. కాగా రాహుల్ గాంధీ రాకను వ్యతిరేకిస్తూ.. ఏబీవీపీ కార్యకర్తలు నిరసన వ్యక్తం చేస్తూ... రాహుల్ ను అడ్డుకునే ప్రయత్నం చేశారు. అర్థరాత్రి హెచ్‌సీయూకి చేరుకున్న రాహుల్‌ గాంధీ నేరుగా రోహిత్‌ స్మారక స్థూపం వద్ద నివాళులర్పించి దీక్షలో కూర్చున్నారు. ఈ దీక్షలో రోహిత్‌ తల్లి రాధిక, సోదరుడు రాజా, పలువురు విద్యార్థులు, ఉపాధ్యాయులు ఉన్నారు.

నేటి ఉదయం నుంచి మధ్యాహ్నం వరకు జరిగే నిరసన దీక్షలో పాల్గొంటారు. శంషాబాద్‌ నుంచి వస్తున్న రాహుల్‌ గాంధీ వాహన శ్రేణిని ఏబీవీపీ కార్యకర్తలు 200 మంది అడ్డుకునే ప్రయత్నం చేయగా పోలీసులు లాఠీఛార్జి చేసి చెదరగొట్టారు. రాహుల్‌ పర్యటనను పురస్కరించుకొని పోలీసులు విశ్వవిద్యాలయంలో భారీఎత్తున భద్రత ఏర్పాట్లు చేశారు. రాహుల్‌ పర్యటనకు నిరసనగా ఏబీవీపీ కళాశాలలకు బంద్‌కు పిలుపునివ్వడంతో పోలీసులు బందోబస్తు పెంచారు. ఇదిలా వుండగా తాత్కాలిక వి.సి గా వ్యవహరిస్తున్న ఇన్ చార్జ్ వీసీ శ్రీవాస్తవ అర్ధాంతరంగా శెలవులోకి వెళ్లారు. ఈ సెలవుకు కారణాలు ఇంకా తెలియలేదు. అయితే మెమెన్ లాంటి ఉగ్రావాది ఉరిని వ్యతిరేకించిన వ్యక్తికి మద్దతుగా.. ఓ ఎంపీగా రాహుల్ రావడం మీద ఏబీవీపీ కార్యకర్తలు మండిపడుతున్నారు. రాహుల్ గాంధీ పర్యటనను నిరసిస్తూ.. ఏబీవీపీ నేడు కళాశాలల బంద్ కు పిలుపునిచ్చింది.