ITEMVIDEOS:భాగ్యనగరంలో సింధు ఫీవర్

Posted: 08/22/2016 09:08 AM IST

రియో ఒలింపిక్స్ లో బ్యాడ్మింటన్ రజత పతకంతో వెలుగులు విరజిమ్మిన పీవీ సింధూ ఘనస్వాగతానికి భాగ్యనగరం ముస్తాబయ్యింది. పలు కూడళ్లలో ఆమెకు స్వాగతం పలుకుతూ హోర్డింగులు, పోస్టర్లు వెలిశాయి. కాగా, ఆమెకు స్వాగతం పలికేందుకు ఇరు రాష్ట్రాల నేతలు కదిలారు. తెలంగాణ మంత్రులు మంత్రి మహేందర్ రెడ్డి, ఎమ్మెల్సీలు నరేందర్ రెడ్డి, శంభీపూర్ రాజు, నగర మేయర్ బొంతు రామ్మోహన్ సహా పలువురు ప్రముఖులు శంషాబాద్ విమానాశ్రయానికి చేరుకున్నారు. అక్కడి నుంచి ర్యాలీగా సింధు, ఆమె కోచ్ గోపీచంద్ లు నగరంలోకి వస్తున్నారు.

మార్గమధ్యంలో ట్రాఫిక్ ఆంక్షలు విధించగా, పలు స్కూళ్ల విద్యార్థులు, అభిమానులు రహదారికి ఇరువైపులా నిలిచి సింధూపై పూల వర్షం కురిపించారు. ర్యాలీ దాదాపు రెండు గంటలకు పైగా సాగుతుందని అంచనా. ఆపై గచ్చీబౌలీ ఇండోర్ స్టేడియంలో మధ్యాహ్నం 12 గంటల ప్రాంతంలో సింధూకు ఘన సన్మానం జరుగనుంది. సింధూ రాకకోసం ఎదురుచూస్తూ అభిమానులు శంషాబాద్ నుంచి గచ్చీబౌలీకి వెళ్లే దారిలో ఎదురుచూస్తుండగా, నగర వ్యాప్తంగా సింధూ ఫీవర్ కనిపించింది.