ఈజిప్ట్ రాష్ట్రపతిని తొలగించిన సైన్యాధికారి

Posted: 07/04/2013 11:32 AM IST

గత కొద్ది కాలంగా ఈజిప్ట్ అధ్యక్షుడు మహమ్మద్ మోర్సీ మీద వస్తున్న వ్యతిరేకతలు, దరిమిలా ఆయనకు అనుకూల ప్రతికూల వర్గాల మధ్య జరిగిన కొట్లాటలకు తెరదించుతూ ఈజిప్ట్ సైన్యాధికారి నిన్న రాత్రి టివి లో మోర్సీని తొలగించినట్లుగా ప్రకటించారు.  ఈజిప్ట్ రాజ్యాంగాన్ని కూడా రద్దు చేసిన కమాండర్ జనరల్ అబ్దెల్ ఫత్తా అల్ సిసి, తాత్కాలికంగా రాజ్యాంగం ప్రకారం నెలకొన్న న్యాయస్థాన ప్రధాన న్యాయమూర్తి గద్దె దించిన మోర్సీ స్థానంలో బాధ్యతలు చేపడతారని ప్రకటిస్తూ, త్వరలోనే ఎన్నికలను నిర్వహిస్తామని హామీ ఇచ్చారు.  టివిలో సైన్యాధ్యక్షుడి ప్రకటన వస్తూనే కైరో లోని తెహ్రీర్ స్వేర్ లో బాణాసంచాని కాల్చి సంతోషాన్ని వెలిబుచ్చారు.

మహమ్మద్ మోర్సీ అధికారంలోకి వచ్చి సంవత్సరకాలమే అయినా, ఆయన తన స్వప్రయోజనాలకోసం, అధికారాలను చేపట్టటానికి మాత్రమే పని చేస్తున్నారు తప్ప ప్రజాప్రయోజనాలను విస్మరించారనే ఆరోపణ వెల్లువెత్తింది.  దానితో సర్వ సైన్యాధికారి మోర్సీకి పదవి నుంచి తొలగమని 48 గంటల గడువు ఇచ్చారు.  అధ్యక్షుడు ఆ పని చెయ్యకపోవటంతో నిన్న రాత్రి ఆయనను తొలగించినట్టుగా ప్రకటించటం జరిగింది.

పదవీచ్యుతుడైన అధ్యక్షుడుని రహస్య స్థావరానికి తరలించటం జరిగింది.  మోర్సీకి మద్దతునిచ్చే కొన్ని టివి ఛానెల్స్ ప్రసారాలు ఆగిపోయాయి.  ఈజిప్ట్ మరోసారి ప్రజాస్వామ్యాన్ని కోల్పోతుందేమోననే అనుమానాన్ని కొందరు రాజకీయ విశ్లేషకులు వ్యక్తంచేసారు.

-శ్రీజ