జగన్ బయటకొస్తాడు జాగ్రత్త : బాబు

Posted: 07/04/2013 04:11 PM IST

స్థానిక ఎన్నికల నగారా మోగటంతో.. రాష్ట్రంలోని రాజకీయ పార్టీలు ఉరుకులు, పరుగులు తీస్తున్నాయి. ఆయా పార్టీల నాయకులకు ఆగమేఘాలమీద పంచాయతీ మీటింగ్ లు పెడుతున్నారు. తమ పార్టీల గెలుపుకోస ప్రత్యక్ష పార్టీల మీద వేసే ఆయుధాలకు పదును పెట్టి రంగంలోకి దిగుతున్నారు. ముందుగా తెలుగుదేశం పార్టీ అధినేత నారా చంద్రబాబు నాయుడు స్థానిక ఎన్నికల మీద జోరు పెంచారు. చంద్రబాబు టార్గెట్ వైఎస్ఆర్ కాంగ్రెస్. రాష్ట్రంలో ఉన్న అవినీతి పరులను తొలగించండని చంద్రబాబు పిలుపునిచ్చారు. పంచాయతీ ఎన్నికలలో గెలిస్తే వైఎస్ఆర్ కాంగ్రెసు పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డి బయటకు వస్తారని ఆ పార్టీ నేతలు ప్రచారం చేస్తున్నారని, అలాంటి అవినీతి పార్టీకి ఓటేయవద్దని చంద్రబాబు నాయుడు విమర్శించారు.

విజయవాడలో టిడిపి రెండో ప్రాంతీయ సదస్సు జరిగింది. జగన్ పార్టీకి ఓటేస్తే అవినీతికి ఓటు వేసినట్లేనన్నారు. వైఎస్ఆర్ కాంగ్రెసు పార్టీది కాంగ్రెసు డిఎన్ఏనే అని రాష్ట్ర కాంగ్రెసు పార్టీ వ్యవహారాల పర్యవేక్షకులు దిగ్విజయ్ సింగ్ స్వయంగా చెప్పారని గుర్తు చేశారు. కాంగ్రెసు, వైఎస్ఆర్ కాంగ్రెసు... ఈ రెండు డిఎన్ఏలు దేశాన్ని దోచుకునేవేనని ఎద్దేవా చేశారు. పంచాయితీ ఎన్నికల్లో మంచి నేతను ఎన్నుకుంటేనే పంచాయితీల రూపురేఖలు మారుతాయని, ఆదర్శ గ్రామాలుగా అభివృద్ధి చెందుతాయని తెలిపారు. అవినీతిపరులను గ్రామాలకు దూరంగా ఉంచాలన్నారు. ప్రజలకు మెరుగైన సేవలు అందించేందుకే టిడిపి పని చేస్తోందని తెలిపారు. పంచాయితీలను బలోపేతం చేయడానికే ప్రాంతీయ సదస్సులు నిర్వహిస్తున్నామని చంద్రబాబు వెల్లడించారు. అవినీతిపరులను గ్రామాలకు దూరంగా ఉంచాలని, ఎన్నికలలో ఓడించాలని పిలుపునిచ్చారు. అయితే స్థానిక ఎన్నికల్లో ఏ రాజకీయ పార్టీ ఓడిస్తారో ఓటర్లు చెబుతారు. అప్పటి వరకు ఇలాంటి కామెంట్స్ వింటు ఎంజాయ్ చేద్దామనే ఉద్దేశంలో ప్రజలు ఉన్నారు.