‘బాబూ.. ఎందుకు భయపడుతున్నావ్?’

Posted: 06/08/2015 01:48 PM IST

Botsa satyanarayana controversial statements on chandrababu naidu media press meet

ఉమ్మడి ఆంధ్రరాష్ట్రంలో కాంగ్రెస్ పార్టీ తరఫున పీసీసీ చీఫ్ గా వ్యవహరించిన బొత్స సత్యనారాయణ.. ఎన్నికల్లో ఘోరంగా పరాజయం అయిన తర్వాత కంటికి కనిపించకుండా పోయారు. అప్పుడప్పుడు మెరుపుతీగలా మీడియాలో కనిపించించి ప్రత్యర్థి పార్టీలపై గొంతుచించుకున్నారే తప్ప.. తన భవిష్యత్ ప్రణాళికల గురించి ఏమాత్రం నోరువిప్పలేదు. అయితే.. కాంగ్రెస్ పార్టీ కొనసాగితే తనకు రాజకీయ భవిష్యత్ వుండదని భావించిన ఈయన.. పార్టీ కండువాను మార్చేశారు. ఈ క్రమంలోనే ఈయన 07-06-2015వ తేదీన వైఎస్ఆర్ కాంగ్రెస్ పార్టీలో చేరారు.

వైకాపాలో చేరిన తర్వాత బొత్స తొలిసారి మీడియాతో మాట్లాడారు. ఈ సందర్భంగా ఆయన తనదైన శైలిలో ఏపీ సీఎం చంద్రబాబు నాయుడుపై విరుచుకుపడ్డారు. ఓటుకు నోటు వ్యవహారంలో బాబు ఏ విధమైన అక్రమాలకు పాల్పడకుండా వుంటే.. వారం రోజులుగా ఆయన ఎందుకు నోరు విప్పలేదని ప్రశ్నించారు. ‘బాబూ.. నీకు భయమెందుకు? నువ్వేమీ తప్పు చేయకుంటే స్వయంగా విచారణకు ఆదేశించు’ అని ఆయన డిమాండ్ చేశారు. అమరావతి నిర్మాణం పేరిట బాబు సింగపూర్ చుట్టూ తిరుగుతున్నాయని ఆయన విమర్శించారు.

ఈ క్రమంలోనే ఆయన బాబు మీద మండిపడుతూ.. సింగపూర్ లో బాబుకు వ్యాపారాలున్నాయని, అందుకే ఆ దేశ ప్రభుత్వాన్ని కాకా పడుతూ వేల కోట్ల రూపాయల విలువైన కాంట్రాక్టులు అప్పగించేందుకు ప్లాన్ చేస్తున్నారని దుయ్యబట్టారు. బాబు మాయమాటలు చెబుతూ ప్రజలను మోసం చేస్తున్నారని బొత్స తీవ్రంగా విమర్శలు గుప్పించారు.