బాబు మోసం చేస్తున్నారు : జగన్

Posted: 11/03/2015 06:44 PM IST

Ys jagan mohan reddy comments on chandrababu naidu

వైకాపాధినేత వైఎస్ జగన్మోహన్ రెడ్డి మరోసారి ఏపీ సీఎం నారా చంద్రబాబుపై నిప్పులు చెరిగారు. కేవలం రాజధాని అమరావతి మీదే దృష్టి సారించిన బాబు.. రాయలసీమ, ఉత్తరాంధ్ర జిల్లాలకు అన్యాయం చేస్తున్నారంటూ జగన్ ఆగ్రహం వ్యక్తం చేశారు. ఆంధ్రప్రదేశ్ లోని అన్ని జిల్లాలను బాబు ఒకేలా చూడటం లేదని, కేవలం కొన్నింటికి మాత్రమే ప్రాధాన్యమిస్తూ ఇతరుల భావోద్వేగాలను రెచ్చగొడుతున్నారని ఆయన ఆరోపించారు. అభివృద్ధి అనేది అన్ని జిల్లాలకు విస్తరించాలని తన అభిప్రాయాన్ని వెల్లడించారు. కడపలోని సింహాద్రిపురం మండలంలో వున్న పైడిపాలెంట ప్రాజెక్టును సందర్శించిన జగన్.. ఈ సందర్భంగా మీడియాతో మాట్లాడుతూ బాబుపై విమర్శలు గుప్పించారు.

హైదరాబాద్ చుట్టూనే అభివృద్ధి మొత్తాన్ని కేంద్రీకృతం చేయడం కారణంగానే ఉద్యమాలు జరిగాయని, అటువంటి సంఘటనలు నవ్యాంధ్ర రాష్ట్రంలో జరగకుండా ఉండేలా చూడాలన్నారు. అందుకోసం రాష్ట్రంలో అభివృద్ధిని వికేంద్రీకరించాలని సూచించారు. అంతేగానీ తాము ఏమాత్రం రాజధానికి వ్యతిరేకం కాదని జగన్ స్పష్టం చేశారు. కరువు మండలాల ప్రకటనలో చంద్రబాబు పక్షపాత ధోరణి స్పష్టంగా కన్పించిందని జగన్ ఆరోపించారు. పులివెందుల నియోజకవర్గంలో కేవలం ఒకే ఒక్క మండలాన్నే కరువు మండలంగా ప్రకటించారన్నారు. ఇంకా శ్రీశైలం నుంచి కిందికి నీరు విడుదల చేయడం, పద్మావతి మెడికల్ కళాశాల సీట్లు మొదలైన విషయాలపై జగన్ మాట్లాడారు. బాబు ధోరణి సరిగ్గా లేదని, ఆయన అభివృద్ధి విధానం కేవలం కొన్ని జిల్లాలకు మాత్రమే పరిమితంగా వుందని అన్నారు.