జనవరి 10వ తేదీనే మహేష్ సినిమా విడుదల

Posted: 12/26/2013 06:01 PM IST

మహేష్ బాబు-సుకుమార్ కాంబినేషన్లో తెరకెక్కిన ‘1-నేనొక్కడినే ’ సినిమా విడుదల రెండు రోజులు వాయిదా పడిందని, దానికి కారణం పోస్ట్ ప్రొడక్షన్ కార్యమాలని, కాదు ప్రముఖ నిర్మాత దిల్ రాజు నిర్మించిన ‘ఎవడు ’ చిత్రానికి ఎక్కువ థియేటర్లు బుక్ చేసుకోవడమే కారణం అని ఇలా రకరకాల వార్తలు వెబ్ మీడియాలో షికారు చేసిన విషయం తెలిసిందే.

ఈ వార్తల పై ఆ చిత్ర నిర్మాణ సంస్థ 14రీల్స్ సంస్థ అధినేతలు తాజాగా స్పందించారు. ‘1’ పడిందని వస్తున్న వార్తల్లో ఎటువంటి నిజం లేదని, మొదట ప్రకటించిన తేదీ అనగా జనవరి 10వ తేదీనే ఈ సినిమాను విడుదల చేస్తున్నట్లు ప్రకటించారు. కొందరు కావాలనే ఈ వార్తలను పుట్టించారని వాటిల్లో నిజం లేదని ప్రకటించారు.

ఈనెల 19వ తేదీన విడుదల అయిన ఆడియోకి ప్రేక్షకుల్లో మంచి రెస్పాన్స్ వచ్చిందని, ఆడియో సూపర్ హిట్ టాక్ తెచ్చుకుందని, సినిమా కూడా అంత కంటే ఎక్కువ రేంజ్ లో హిట్టవుతుందని వారు ధీమా వ్యక్తం చేశారు. తొలిసారిగా మహేష్ తనయుడు గౌతమ్ కీలక పాత్ర పోషించిన ఈ సినిమా పై ప్రేక్షకుల్లో భారీ అంచనాలే ఏర్పడ్డాయి.

మహేష్ సరసన కొత్త కథానాయిక కృతి సనాన్ నటిస్తుంది. తొలిసారిగా దేవీ శ్రీ సంగీతం అందించిన ఈ సినిమా ఆడియో సూపర్ హిట్ అయిన విషయం తెలిసిందే. మరి ఇప్పటికైనా ఈ సినిమా విడుదల విషయంలో వస్తున్న పుకార్లకు పుల్ స్టాప్ పడుతుందో లేదో చూడాలి.