యంగ్ టైగర్ ఎన్టీఆర్ బర్త్ డే స్పెషల్

Posted: 05/20/2015 10:07 AM IST

యంగ్ టైగర్ ఎన్టీఆర్. ఈ పేరుకు పరిచయం అనవసరం. తెలుగు ఇండస్ట్రీ గురించి తెలిసిన వారందరికీ ఎన్టీఆర్ ఎప్పటికీ సుపరిచితుడే. స్వర్గీయ నందమూరి తారకరామారావుకు మనవడిగా, నటుడు హరికృష్ణ తనయుడిగా తెలుగు ఇండస్ట్రీలోకి అడుగుపెట్టిన ఎన్టీఆర్... ప్రస్తుతం టాలీవుడ్ టాప్ 5 స్టార్ హీరోల్లో ఒకడిగా స్థానం సంపాదించుకున్నాడు.

నేడు ఎన్టీఆర్ జన్మదినం. ఈ సంధర్భంగా ఎన్టీఆర్ కు ప్రత్యేక శుభాకాంక్షలు తెలియజేస్తుంది తెలుగువిశేష్. ఎన్టీఆర్ మొట్టమొదటిసారిగా ‘బ్రహ్మర్షి విశ్వామిత్ర’ చిత్రం ద్వారా బాలనటుడిగా తెలుగుతెరకు పరిచయమయ్యాడు. ఆ తర్వాత వచ్చిన ‘బాలరామాయణం’ ఎన్టీఆర్ కు మంచి గుర్తింపును తెచ్చిపెట్టింది.

2001లో ‘నిన్నుచూడాలిని’ చిత్రంతో హీరోగా ఎంట్రీ ఇచ్చాడు. కానీ ఆ సినిమా అంతగా ఆకట్టుకోలేకపోయింది. కానీ ఆ తర్వాత రాజమౌళి దర్శకత్వంలో వచ్చిన ‘స్టూడెంట్ నెం1’ చిత్రం మంచి విజయం సాధించింది. ఆ తర్వాత వి.వి.వినాయక్ దర్శకత్వంలో వచ్చిన ‘ఆది’ సినిమాతో ఎన్టీఆర్ కు భారీ అభిమానులు ఏర్పడ్డారు. ఆ తర్వాత మరోసారి రాజమౌళి దర్శకత్వంలో వచ్చిన ‘సింహాద్రి’ సినిమాతో ఎన్టీఆర్ స్టార్ హీరోగా ఎదిగిపోయాడు. ఇక ఆ తర్వాత ఎన్టీఆర్ వెనక్కి తిరిగి చూసుకోవల్సిన పరిస్థితి రాలేదు.

ఇక అప్పటినుంచి నటుడిగా, డాన్సర్ గా, మాస్ హీరోగా ఎప్పటికప్పుడు తనని తాను నిరూపించుకునే వుంటున్నాడు. ఇటీవలే విడుదలైన ‘టెంపర్’ చిత్రం బ్లాక్ బస్టర్ హిట్టయ్యింది. ప్రస్తుతం సుకుమార్ దర్శకత్వంలో తెరకెక్కుతున్న ఓ చిత్రంలో ఎన్టీఆర్ హీరోగా నటిస్తున్నాడు. త్వరలోనే ఈ చిత్రం కూడా ప్రేక్షకుల ముందుకు రానుంది. మరి ఇలాగే ఎన్టీఆర్ తన సినిమాలతో మనల్ని అలరించాలని కోరుకుందాం.