వామ్మో! అక్కడికెళ్తే వీపు విమానైపోదూ..?

Posted: 11/10/2014 10:06 AM IST

సాధారణంగా చిత్రపరిశ్రమలో అగ్రతారలుగా పేరొందిన వారందరూ సినిమాలతోపాటు ఏదో ఒక కంపెనీకిగానీ, ఉత్పత్తికిగానీ, ఇతర ప్రొడక్ట్స్ కు ప్రచారకర్త (బ్రాండ్ అంబాసిడర్)గా కొనసాగుతుంటారు. వీటితోపాటు నగలు, చీరల దుకాణాలు, షాపింగ్ మాల్స్ ఓపెనింగ్స్ లకు కూడా హాజరవుతారు. ఇలా చేయడం వల్ల వారికి కొంత వ్యయం రావడంతోపాటు కాస్త అభిమానుల క్రేజ్ కూడా కలిసొస్తుంది. ఫలితంగా వాళ్లకు అన్నీవిధాల ‘ప్లస్’ పాయింట్లే వస్తాయి. కానీ మూడుపదుల సెక్సీ భామ నయనతార మాత్రం ఇటువంటి వ్యవహారాలకు దూరంగానే వుంటానని పేర్కొంటోంది. షాపింగ్ ఓపెనింగ్స్ కి వెళితే వీపు విమానమైపోద్దంటూ ఈమె తన అభిప్రాయాన్ని వెల్లడిస్తోంది.

నిజానికి నయన తానెప్పుడో మొదట్లో కాస్త పేరున్న తారగా కొనసాగుతున్న నేపథ్యంలో ఒక్కసారి చీరల దుకాణానికి ప్రచారకర్తగా వ్యవహరించింది. ఆ తర్వాత ఆమె ప్రొడక్ట్స్ కు బ్రాండ్ అంబాసిడర్ గా గానీ... షాప్ ఓపెనింగ్స్ కి కానీ వెళ్లిన దాఖలాలే లేవు. వరుసగా సినిమాలు చేసుకుంటూ తన పని తాను చేసుకంటూపోతోంది. ప్రచారకర్తగా తనకు ఎన్నో ఆఫర్లు వచ్చినా... వాటికి తిరస్కరించి ఇంట్లోనే హాయిగా రిలాక్స్ అయిపోతోంది. ‘‘అదేంటీ..? ప్రచారకర్తగా ఒప్పందం కుదుర్చుకుంటే మంచి ఆదాయంతోపాటు క్రేజ్ కూడా లభిస్తుంది కదా..?’’ అంటూ ఆమెను ఇంటర్య్వూలో ప్రశ్నించగా.. అందుకు తాను తనదైన రీతిలో సమాధానమిచ్చింది.

ఈ వ్యవహారంలోనే నయన మాట్లాడుతూ.. ‘‘మేము షాప్ ఓపెనింగ్స్ ఒప్పుకున్నామనుకోండి... అక్కడికెళ్లిన తర్వాత తీరిగ్గా పూజా కార్యక్రమాలు మొదలుపెడతారు. ఆ తర్వాత నాలుగైదు రకాల చీరలిచ్చి.. ఒకదాని తర్వాత ఒకటి మార్చుకోమంటారు. ఆ చీరల్లో మేం ఫొటోలకు పోజులివ్వాలి. ఇక.. ఫలానా కార్యక్రమానికి సెలబ్రిటీలు వస్తున్నారని ముందే ప్రకటిస్తారు కాబట్టి, విపరీతమైన జనాలు అక్కడికి వాలిపోతారు. దాంతో ఆ హడావుడిల మధ్య ఏం జరుగుతుందోనని ఒకటే టెన్షన్. అందుకే.. అక్కడికెళ్లి టెన్షన్ పడే బదులు.. ఆ సమయంలో ఎంచక్కా ఇంటి పట్టున ఉండి రిలాక్స్ అయిపోవచ్చు కదా’’ అని అంటోంది.